कोरोना संक्रमणका कारण निधन भएका सशस्त्र प्रहरी निरीक्षक (इन्सपेक्टर ) नवीन बुढाथोकीको अन्त्येष्टि गरिएको छ।
शवको विराटनगरस्थित परोपकार घाटमा मंगलबार धार्मिक संस्कार अनुसार मृतक बुढाथोकीका काका टीकाराम खुलालले अन्त्येष्टि गरेका छन्।
उनी घरका जेठा सन्तान थिए। घरमा आमा बाबु र भाइ बहिनी रहेको तेह्रथुमको म्याङलुङ नगरपालिका–१ का वडाध्यक्ष इन्द्रराज लिम्बुले जानकारी दिए। बुढाथोकी सोही वडा निवासी हुन्।
२०६८ सालमा प्रहरी निरीक्षकबाट सेवामा प्रवेश गरेका बुढाथोकीले संखुवासभा लगायत पूर्वका विभिन्न ठाउँमा कार्यरत थिए।
उनी अत्यन्तै मिजासिला रहेको लिम्बुको भनाइ छ।
बुढाथोकीको निधनले गाउँनै शोकमा डुबेको लिम्बुको भनाइ छ।
घरको जेठो छोराको निधनमा उनका बाबुआमा बेहोश अवस्थामा रहेको समेत लिम्बुले बताए।
उनको बहिनीको विवाह भइसकेको र घरमा सानो भाइ र आमा बुबा मात्रै छन् ।
केही समयपछि विवाह गर्ने तयारी रहेको समेत उनका साथीभाई बताउछन्।
तेह्रथुम घर भएपनि मोरङको टंकीसिनवरीमा कार्यरत सशस्त्र प्रहरी निरीक्षक ३३ बर्षीय नविन बुढाथोकीको उपचारको क्रममा मृत्यु भएको हो ।
उनको गए राती करिब ११ बजेर २२ मिनेटमा मृत्यु भएको बताइएको छ ।
बुढाथोकीको मोरङको बुढीगंगास्थित विराट मेडिकल कलेजमा उपचारको क्रमम मृत्यु भएको हो । उनी कार्तिक २६ गते अस्पताल भर्ना भएका थिए भने २७ गते संक्रमण पुष्टि भएको थियो ।
उपचारका क्रममा बुढाथोकीको दुई पटक प्लाज्मा थेरापी गरिएको थियो भने १० पटकसम्म रेम्डिसिभिर प्रयोग गरिएको अस्पतालले जनाएको छ ।
उनी कोरोना संक्रमण नियन्त्रणकै काममा खटिएका थिए।
