प्रधानमन्त्री केपी शर्मा ओलीले हिजो साँझ नेपाली काँग्रेसका सभापति शेरबहादुर देउवासँग महत्वपूर्ण भलाकुसारी गरेका छन् ।
तीन घन्टा बालुवाटारमा दुवै नेताले राजनीतिक घटनाक्रमको समिक्षा गरेर भविष्यमा मिलेर जानेबारे कुराकानी गरेको बुझिएको छ ।
विश्वस्त स्रोतका अनुसार प्रधानमन्त्री ओलीले पार्टीभित्र आएको समस्याबारे कुरा गरेका थिए । उनले देउवासँग मिलेर जाने सम्भावनाबारे समेत बताएका थिए । त्यतिबेला साथ दिन देउवालाई आग्रह गरेको बुझिएको छ ।
देउवा विश्वासपात्रहरु गोपालमान श्रेष्ठ र रमेश लेखकसँगै अपरान्ह बालुवाटार छिरेका थिए । उनी फर्कदा झमक्क साँझ परिसकेको थियो । प्रधानमन्त्री ओलीले पनि विश्वासपात्रहरु सुवास नेम्वाङ, प्रदीप ज्ञवाली र भानुभक्त ढकाललाई सँगै राखेका थिए । बालुवाटारमा दुवै नेताले राजनीतिक समिक्षा गरे । प्रचण्डको पछिल्लो भूमिकाबारे पनि व्याख्या भएको थियो ।
नेपालखबर डटकममा प्रकाशित भएको समाचार अनुसार प्रधानमन्त्री केपी शर्मा ओलीले अहिले देशव्यापी रुपमा पार्टीमा आफ्नो पकड के कस्तो छ र विभाजन भएको अवस्थामा कुन स्तरको शक्ति बन्न सकिन्छ भन्ने आँकलन गर्न ७७ वटै जिल्लामा कार्यकर्ता परिचालन गरेर एक किसिमको सर्भे नै गरिरहेको छन्।
प्रचण्ड–नेपाल पक्षका स्थानीय नेता कार्यकर्ताहरूसँग सम्पर्क सम्बन्ध नै नगरी जिल्ला जिल्लामा खटिएका ओली पक्षीय नेता कार्यकर्ताले स्थानी तहमा आफ्नो शक्तिको आँकलनसहितको रिपोर्ट पठाइरहेका छन्।
त्यसरी खटिएका केही नेताहरूले जनाएअनुसार उनीहरूले पार्टी विभाजन भएको अवस्थामा जिल्लादेखि स्थानीय तहका पार्टी कमिटीका के कति नेता कार्यकर्ता आउँछन्, स्थानीय सरकारका जनप्रतिनिधि कति आफुतिर आउँछन्, संगठन के कसरी विस्तार गर्न सकिन्छ भनेर तथ्याङ्क निकालेर केन्द्रमा पठाउने काम भइरहेको छ।
शनिबार चितवनमा स्थायी कमिटी सदस्य तथा त्यस क्षेत्रका सांसद सुरेन्द्र पाण्डेमाथि गरिएको दुव्र्यवहारले पनि ओली पक्ष स्थानीय तहमा आक्रामक रुपमा उत्रिएको पुष्टि हुन्छ।
प्रधानमन्त्री ओलीले हालै गरेको संखुवासभा भ्रमण र त्यहाँ गरिएको भेटघाट तथा सभा, मंसिर ८ गतेका लागि तय गरिएको ताप्लेजुङ भ्रमण पनि जनमत बुझ्ने र शक्ति आँकलन गर्ने उद्देश्यसाथ गरिएको केही नेताहरूको भनाई छ।
ओली पक्षले देशव्यापी रुपमा आफ्नो शक्ति आँकलन गर्न राज्यका संयन्त्रहरू र मदन भण्डारी फाउण्डेसनका स्थानीय सञ्जाल समेत परिचालन गरेको प्रचण्ड–नेपाल पक्षको दाबी छ।
प्रधानमन्त्री ओली पार्टीभित्र कुरा नमिलेमा देउवासँग मिलेर जाने तयारीमा छन् । आफूलाई पार्टी कमिटीले हटाउने निर्णय गर्ने सम्भावना रहेसँगै ओलीले विकल्प तयार गरेका छन् । पार्टी दुर्घटनामा परेमा उनी देउवाको साथ लिएर बढ्ने तयारीमा रहेको बुझिएको छ । देउवाले पनि ओलीलाई साथ दिदै आएका छन् । उनले साथ नदिएको भए संसदमा विशेष अधिवेशन डाकेर अविश्वासको प्रस्ताव आइसक्थ्यो । देउवाको साथले यो टर्दै आएको छ ।
देउवाले पनि विगतमा प्रचण्डले आफूलाई धोका दिएको गुनासो गर्न छाडेका छैनन् । संसदको चुनाव अघि अचानक प्रचण्ड ओलीसँग मिलेर गएपछि देउवा रुष्ट छन् । त्यसयता दुई नेताबीच दुईपटक मात्र एक्ला एक्लै भेटवार्ता भएको छ । देउवाले आफूलाई धोका दिएको भन्दै प्रचण्डको आलोचना गर्दै आएका छन् ।
