नेपालमा कोरोना भाइरसको संक्रमणबाट थप १७ जनाको निधन भएको छ ।
स्वास्थ्य तथा जनसंख्या मन्त्रालयले मंगलबार अपरान्ह सार्वजनिक गरेको तथ्यांकअनुसार नयाँ संक्रमितभन्दा निको हुनेको संख्या ५ गुणाभन्दा बढी छ ।
वितेको २४ घन्टामा ५०२ नयाँ संक्रमित फेला पर्दा कोरोनामुक्त हुनेको संख्या २ हजार ८७८ रहेको छ । परिक्षण संख्या कम भएकाले नयाँ संक्रमितको संख्या पनि कम हुन पुगेको हो । मन्त्रालयले सार्वजनिक गरेको स्थिति प्रतिवेदनमा आधारमा गत २४ घन्टामा ३ हजार ११२ नमूना परिक्षण गर्दा ५०२ जनामा संक्रमण पाइएको छ । यो भनेको परिक्षण गरिएका नमूनामध्ये १६ दशमलव १३ प्रतिशतमा कोरोना भाइरसको संक्रमण पाइएको हो ।
आज भेटिएका संक्रमितमध्ये २०४ जना महिला हुन् भने २९८ पुरुष हुन् । आज काठमाडौं उपत्यकामा १४६ महिला र १९३ पुरुष गरी ३३९ जनामा संक्रमण पाइएको छ ।
योसहित कूल संक्रमितको संख्या २ लाख ११ हजार ४७५ पुगेको छ जसमध्ये १ लाख ७९ हजार २४२ जना कोरोनामुक्त भएका छन् ।
अहिलेसम्म कोरोना भाइरसको संक्रमणबाट १ हजार २४७ जनाको निधन भएको छ भने सक्रिय संक्रमितको संख्या ३० हजार ९८६ मा झरेको छ ।
मन्त्रालयले अहिलेसम्म १६ लाख १७ हजार २३ जनाको कोरोना परिक्षण गरिएको बताएको छ ।
