पर्सामा लक्ष्मीपूजाको लागि घरमा बालिएको दियोबाट आगलागी हुँदा एक किशोरीको ज्यान गएको छ ।

शनिबार राति भएको आगलागीमा बहुदरमाई नगरपालिका – ८ रामनगरी बस्ने मनबोध साहकी छोरी १५ वर्षिया मनाकुमारी साहको मृत्यु भएको हो ।

प्रहरीले दिएको जानकारी अनुसार आगलागी हुँदा घरमै सुतिरहेकी उनको जलेर मृत्यु भएको हो । घरका अन्य सदस्यले भने भागेर ज्यान जोगाएका थिए ।

आगलागीबाट फुसको घरमा रहेको लत्ताकपडा, खाद्यान्नलगायतका सामग्रीहरु जलेर नष्ट भएको छ । करिब ५ लाख बराबरको क्षति भएको अनुमान गरिएको छ ।

शव पोष्टमार्टमका लागि वीरगञ्जस्थित नारायणी अस्पतालमा ल्याइएको प्रहरीले जनाएको छ ।