नेपाल कम्युनिष्ट पार्टी नेकपाका अध्यक्ष तथा प्रधानमन्त्री केपी शर्मा ओली र अर्थमन्त्री विष्णु पौडेलबीचको भेटवार्तामा पार्टी उपाध्यक्ष वामदेव गौतम पनि सहभागी हुने भएका छन् ।
प्रधानमन्त्री निवास बालुवाटारमा आज बिहान प्रधानमन्त्री ओली र अर्थ मन्त्री बिष्णु पौडेलबीच भइरहेको भेटवार्तामा उपाध्यक्ष गौतम पनि पुगेको बालुवाटार स्रोत बताउँछ ।
पछिल्लो समय पार्टीका कार्यकारी अध्यक्ष पुष्पकमल दाहाल प्रचण्ड र ओलीबीचको विवाद चरम उत्कर्षमा पुगेका बेला ओलीले गौतमसँग पनि पार्टी विवादबारे छलफल गरेको बताइएको छ ।
पछिल्लो पटक बसेको सचिवालय बैठकमा प्रचण्डले एकल राजनीतिक प्रस्ताव प्रस्तुत गरेपछि ओली र प्रचण्ड पक्षबीचको विवाद जटिल मोडमा गएको हो ।
हिजोको सचिवालय बैठकमा कार्यकारी अध्यक्ष पुष्पकमल दाहालले १९ पृष्ठ लामो राजनीतिक प्रतिवेदन पेश गरेपछि अध्यक्ष तथा प्रधानमन्त्री केपी शर्मा ओली पक्षधर नेताहरुले उक्त प्रस्ताव फिर्ता लिनुपर्ने माग राख्दै आएका छन् ।
विगत ६ महिना भन्दा बढी समयदेखि पार्टीको आन्तरिक विवाद मिल्न नसक्दा नेताहरुको ध्यान शक्ति सन्तुलनमा मात्र सिमित हुन पुगेको छ । जसले गर्दा सरकारले गर्नुपर्ने अरु कामहरु निकै नै प्रभावित बनेका छन् ।
नेकपामा केही महिनादेखि देखिएको किचलोले गर्दा आगामी निर्वाचनमा नेकपालाई ठूलो धक्का पुग्ने अनुमान लगाउन थालिएको छ । झण्डै २ तिहाई बहुमत पाएको सरकारले जनताका आंकाक्षा अनुरुप काम गर्न छाडेको कुर्सी जोगाउन लागेपछि आगामी निर्वाचनमा त्यसको असर पर्ने आंकलन हुन थालिसकेका छन् ।