वार कि पार’को अवस्थामा रहेको सत्तारुढ नेकपा विवादमा मूलतः तीन पक्ष छन् । प्रधानमन्त्री केपी शर्मा ओली, अर्का अध्यक्ष पुष्पकमल दाहाल र वरिष्ठ नेता माधवकुमार नेपाल । सहायक पक्षमा झलनाथ खनाल, बामदेब गौतम नारायणकाजी श्रेष्ठलगायत छन् ।
ओलीविरुद्ध दाहाल नेपाल मोर्चा कसेर लागेका छन् । ओलीको अबको एक मात्र रणनीति दाहाल पक्षबाट नेपाललाई अलग्याउनु हो ।
त्यसका लागि उनले नेपाल समूहका नेताहरुसँग एक्लाएक्लै र सामूहिक छलफल समेत गर्ने गरेका छन् । त्यसका लागि नेता नेपाललाई ओलीले विभिन्न अफर गरेका छन् । नेपाललाई सहकार्यका लागि भावी पार्टी अध्यक्ष वा प्रधानमन्त्रीमा समर्थन गर्ने विकल्पसहितको प्रस्ताव गरेका छन् । कार्यकारी अध्यक्ष दाहालसँग दूरी बढेका बेला निर्णायक ‘पोजिसन’मा रहेका नेपाललाई प्रधानमन्त्री ओलीले सहकार्यको प्रस्ताव अगाडि सारेका हुन् ।
प्रधानमन्त्री निवास बालुवाटारमा बोलाएर प्रधानमन्त्री ओलीले एकता महाधिवेशनमा अध्यक्ष वा आगामी चुनावपछि प्रधानमन्त्री बनाउन सकिने विकल्पसहित प्रस्ताब गरे ।
करिब साढे दुई घन्टाको छलफलमा प्रधानमन्त्री ओलीले आफूले विगतदेखि नै त्यस्तो प्रस्ताव अघि सारेको भन्दै नेपाललाई आश्वस्त पार्ने कोसिस गरेका थिए । कात्तिकमा मात्रै प्रधानमन्त्री ओलीले नेपाललाई चार पटक भेटेका छन् । हरेक भेटमा जस्तै नेपालले व्यक्तिवाद त्यागेपछि मात्रै सहमति र एकताको विकल्प खुल्ने बताएका छन् ।
नेपालले भने आफूलाई सर्वेसर्वा ठान्ने, विधि र पद्धतिलाई चुनौतीदिँदै अघि बढ्ने प्रधानमन्त्री ओलीकै कार्यशैलीका कारण समस्या उत्पन्न भएको भन्दै त्यसमा तत्काल सुधार गर्न विगतकै शैलीमा ध्यानाकर्षण गराएका थिए । लामै छलफल चले पनि प्रधानमन्त्री ओलीका तर्फबाट पार्टीमा अहिले गहिरिएको संकट समाधानको कुनै नयाँ ठोस प्रस्ताव नआएको नेता सुरेन्द्र पाण्डेले बताए ।
संसदीय दलका उपनेता सुवास नेम्वाङले दुई अध्यक्षबीचको सहमति अपरिहार्य भए पनि अरू नेताहरूसँग पनि सल्लाह गरेर अगाडि बढ्नुपर्छ भन्ने पार्टी नेताहरूकै सुझाबका आधारमा प्रधानमन्त्री ओलीले नेपालसहितका नेताहरूसँग छलफल गरेको बताए । पार्टी अध्यक्ष बन्न सहयोग गर्ने आश्वासनमा विश्वास गर्न नसकिने जनाउ दिँदै नेपाल पक्षले सामूहिक नेतृत्वको प्रस्ताव गरेको थियो। तर ओली यो प्रस्तावमा मौन रहे।
ओलीले नेता नेपाललाई पार्टीको आगामी नेतृत्वका लागि तयार रहन यसअघि पनि आग्रह गरेका थिए।
दाहालबाट पनि अफर
नेपाल समूह अहिले नेकपा विवादमा निर्णायक देखिएको छ । ओली र दाहाल जस्लाई माधव नेपाल समूहले समर्थन गर्छ उही समूह निर्णायक र बलियो हुने भएकोले दुबै अध्यक्षहरु नेपाललाई आफ्नो समूहमा ल्याउन मरिहत्ते गरिरहेका छन् । ओलीले नेपाललाई अध्यक्ष अफर गरेपछि दाहालले पनि नेपाललाई प्रधानमन्त्री पद अफर गरेको स्रोत बताउँछ । दाहाल पनि नेपाल आफ्ने पक्षबाट नबाहिरिउन् भन्ने चाहन्छन् । नेपाललाई प्रचण्डले प्रधानमन्त्री बन्न सहयोग गर्ने बाचा दिइसकेको बताइएको छ। दशैँ अघि नै दुई नेताबीच यस विषयमा समझदारी बनेको हो ।
नेपाल मौन
दोहोरो अफर पाइरहेको नेता नेपाल भने यस विषयमा मौनजस्तै छन् । नेपालले प्रधानमन्त्रीबारे आफ्नो नाममा विमर्श गर्ने समय नआएको प्रतिक्रिया दिएका छन् । एकतालाई जोगाउनुपर्ने पक्षमा धेरै नेपाल समूहका नेताहरूले अभिव्यक्ति दिइरहेका छन् । आफ्नो समूहबाट सामाजिक सञ्जालहरूमा एकताको पक्षमा अभिव्यक्ति दिइरहँदा एकतालाई जोगाउन नेता नेपाल पनि निर्णायक मोडमा देखिएका छन् ।
अहिले नेता नेपाल दुबै अध्यक्षसँग मिल्नु पर्ने अप्ठ्यारो मोडमा छन् । नेपाल निर्णायक भूमिका भए पनि अफ्ठेयारो मोडमा छन् । यति हुँदाहुँदै पनि प्रचण्ड र माधव पनि मिलेर जाने विश्वासिलो वातावरण बनि नसकेको कतिपय नेताहरु बताउँछन् ।
पार्टी संकटमा परेका बेला नेता नेपाललाई भने इतर समूह र आफ्नै समूहबाट पनिअफर आइरहेका छन् । उनको दुवै हातमा लड्डु भएको छ । लड्डु खान भने सजिलो छैन । ओलीले दिने लड्डुको नेपाललाई विश्वास छैन । लिइहाले पनि दाहालको साथ छोड्नुपर्छ । दाहालको लड्डु खान खोज्दा पार्टी नै फुट्ने खतरा उत्पन्न भएको छ । बहुमत सचिवालय सदस्यले बैठक बोलाउन आग्रह गर्दा पनि ओली तयार भएका छैनन् ।
ओलीले मंगलबारसम्म पनि बैठक नबोलाए दाहालले नै सचिवालय बैठक बोलाउने तयारी सो पक्षले गरेका छन् । उक्त सचिवालय बैठकले स्थायी समिति बैठक डाक्ने निर्णय गर्नेछ । त्यसपछि स्थायी समितिले निर्णयक छलफल गर्ने छ ।