पेरिस । यूरोपेली राष्ट्रहरुमा कोरोना भाइरस कोभिड–१९ को दोस्रो लहरले भयावह रुप लिन थालेको छ । फ्रान्समा कोरोना संक्रमणको दास्रो लहरले चापेपछि पुनः एक महिना लामो लकडाउनको घोषणा गरिएको छ । फ्रान्सेली राष्ट्रपति एमानुअल माक्रोनले देशभरि नै नयाँ लकडाउनको घोषणा गरेका छन् ।
फ्रान्सका अस्पतालहरुमा कोरोना संक्रमित चाप निकै बढेकाले यसलाई कम गर्न लकडाउन गर्नु परेको माक्रोनले बताएका छन् ।
उनले राष्ट्रिय टेलिभिजनमार्फत राष्ट्रका नाममा सम्बोधन गर्दै लकडाउन गर्ने निर्णयबारे जानकारी दिएका हुन् ।राष्ट्रपतिका अनुसार नयाँ लकडाउन ३० अक्टोबरदेखि डिसेम्बर १ सम्म लागू हुनेछ । घोषणाअनुसार सुसार केन्द्र र स्कुलहरु भने खुला रहने छन् । लकडाउनको नागरिकहरुलाई अत्यावश्यक सामान खरिद गर्न, स्वास्थ्य परामर्श र एक घण्टा दैनिक व्यायामका लागि निस्किन पाउने छन् । कफी, रेस्टुरेन्ट, बारहरु पूर्णरुपमा बन्द हुनेछन् । सुपरमार्केट र फार्मेसीहरुहरु खोल्न पाइने छ ।
घरबाट काम गर्न असम्भव भएकालाई काममा जान अनुमति दिइने छ । फ्रान्समा हालसम्म संक्रमण पुष्टि हुनेको संख्या १२ लाख ८० हजारभन्दा धेरै छ । कोरोनाबाट मृत्यु हुनेको संख्या ३५ हजार ८ सयभन्दा धेरै छ । दैनिक ४०–५० हजारको हाराहारीमा संक्रमितहरु थपिएका छन् ।