अमेरिकाका वैज्ञानिकले कोरोना भाइरसको संक्रमणलाई सामान्य रुघाखोकी (फ्लु) जस्तो हल्का रूपमा नलिन चेतावनी दिएका छन्।
अमेरिकाको सेन्टर्स फर डिजिज कन्ट्रोल एन्ड प्रिभेन्सन (सिडिसी) ले कोरोना संक्रमणबाट मृत्यु हुने खतरा फ्लुको भन्दा ५ गुणा बढी हुने देखिएको चेतावनी दिएको हो।
पछिल्लो अध्ययनले कोरोनाका बिरामीमा फ्लुका बिरामीलाई भन्दा थप १७ किसिमका जटिल स्वास्थ्य समस्या हुने जोखिम देखाएको हो।
फ्लुका बिरामीलाई भन्दा कोरोनाका बिरामीलाई फोक्सोमा गम्भीर समस्या (रगतमा अक्सिजनको मात्रा कम) हुने सम्भावना १९ गुणा बढी हुने अनुसन्धानले देखाएको छ। यसैगरी फ्लुका बिरामीको तुलनामा कोभिड-१९ का बिरामीमा मुटुको मांसपेशीमा इन्फ्लेमेसन हुने, फोक्सोमा रगत जम्ने तथा मस्तिष्कमा रक्तस्राब हुने समस्या दोब्बर हुने पनि अनुसन्धानले देखाएको छ।
यसैकारण वैज्ञानिकले यसलाई सामान्य रुघाखोकी ठानेर हेलचक्र्याइँ नगर्न वैज्ञानिकले चेतावनी दिएका छन्।
कोरोना संक्रमण भएर होम आइसोलेशनमा बसेका पत्रकार वीरेन्द्र केएम सामाजिक सञ्जाल फेसबुकमा लेख्छन्
भनिए जस्तो सामान्य रोग होइन कोरोना । पुरै शरीरलाई तहस-नहस बनाईदिदो रहेछ । स्वाद/बास्ना केही थाहा नपाउने। न सुत्न मन लाग्ने, नबस्न मन लाग्ने, टिभी, मोबाइल हेर्न त पटकै मन नपर्ने । मोबाईलमा बोल्न त झन “इरेटेसन” फिल हुने ।
त्यसमा पनि पढेलेखेका छर/छिमेकको व्यवहारले त झन पीडा दिने । मानौं यो एरियामै कोरोना फैले जस्तो, टाढाबाट बोल्दा नै कोरोना लागे जस्तो ।