सरकारले सार्वजनिक गाडीका सबै सिटमा यात्रु राख्न दिने निर्णय गरेको छ ।
हिजो बसेको मन्त्रिपरिषद् बैठकले सार्वजनिक गाडीका सबै सिटमा यात्रु राख्न दिने निर्णय गरेको सरकारका प्रवक्तासमेत रहेका परराष्ट्र मन्त्री प्रदीप ज्ञवालीले बताए । ज्ञवालीका अनुसार पूरै सिटमा यात्रु बस्न दिने निर्णयसँगै अब सार्वजनिक गाडीले भाडा पनि पुरानै दरमा लिनुपर्नेछ ।
सरकारले यसअघि काठमाडौं उपत्यकामा भदौ २५ गतेदेखि र लामो दूरीका गाडीमा असोज १ गतेदेखि आधा सिटमा मात्र यात्रु राखेर चलाउन दिएको थियो । यसरी आधा सिटमा मात्र यात्रु राख्न तोकिएको भाडामा ५० प्रतिशतसम्म बढी लिन पाउने व्यवस्था थियो । तर व्यवसायीले भने तोकिएकोभन्दा दोब्बरसम्म भाडा लिँदै आएका गुनासो यात्रुको छ ।
त्यही निर्णयलाई उल्ट्याउँदै सरकारले अब सार्वजनिक गाडीका पूरै सिटमा यात्रु राख्न दिने निर्णय गरेको हो । पछिल्लो समय लामो दूरीको भाडा र हवाई भाडा लगभग उस्तै उस्तै हुन थालेपछि हवाई सञ्जालसँग जोडिएका तराइका विभिन्न जिल्लाहरुमा हवाइ यात्राबाट जाने यात्रुको संख्या पनि बढिरहेको छ । चाडपर्वको समय नजिकँदै जाँदा सरकारले दुवै सिटमा यात्रु बोक्न पाउने नियम लागू गरेपछि काठमाडौंबाट देशका विभिन्न गाउँहरुमा कोरोना पुग्ने समेत केहीले विश्लेषण गर्न थालेका छन् ।