विराटनगर । कोरोना भाइरस संक्रमणबाट मोरङको विराटनगरस्थित नोबेल शिक्षण अस्पतालमा दुई जनाको ज्यान गएको छ ।
नोबेल शिक्षण अस्पतालमा उपचाररत दुई संक्रमित पुरुषको मंगलबार बिहान मृत्यु भएको हो । मृत्यु हुने ५० र ४५ वर्षीय पुरुष मोरङका हुन् ।
मोरङको कानेपोखरी गाउँपालिका(६ का ५० वर्षीय पुरुषको बिहान ३ बजेतिर मृत्यु भएको अस्पतालका जनसम्पर्क अधिकृत नारायण दाहालले जानकारी दिएका छन् । उनका अनुसार ज्वरो आएको भन्दै पुरुषलाई उपचारका लागि चिन्ताजनक अवस्थामा सोमबार दिउँसो अस्पताल ल्याइएको थियो ।
स्वाब संकलन गरेर पीसीआर परीक्षण गराउँदा साँझ ६ बजे रिपोर्ट पोजीटिभ आएपछि आइसोलेसनमा भर्ना गरेर उपचार थालिएको दाहालले बताए । उनका अनुसार भेन्टिलेटरमा उपचाररत पुरुषमा पाँच वर्षदेखि ब्लड क्यान्सरको पुरानो समस्या थियो ।
त्यस्तै रतुवामाई नगरपालिका (८ का ४५ वर्षीय संक्रमित पुरुषको पनि मंगलबार बिहान २ः३० बजेतिर मृत्यु भएको जानकारी दाहालले दि ए। उनलाई उपचारका लागि असोज १३ गते अस्पताल ल्याइएको थियो । स्वाबको पीसीआर परीक्षण गराउँदा भोलिपल्ट रिपोर्ट पोजिटिभ आएपछि आइसोलेसनमा भर्ना गरेर उपचार थालिएको दाहालले बताएका छन् ।
मधुमेहको पुरानै समस्या रहेका पुरुषमा पछिल्लो समय ज्वरो, निमोनिया र टाइफाइट पनि थपिएको उनले बताए । आइसीयूमा राखेर उपचार थालिएको भए पनि पुरुषलाई बचाउन नसकिएको जानकारी उनले दिए । दाहालका अनुसार अहिले नोबेलको आइसोलेसनमा ३४ जना कोरोना संक्रमितको उपचार भइरहेको छ ।