ताप्लेजुङका ८१ वर्षीय कोरोना सङ्क्रमित एक वृद्ध उपचारपश्चात् निको भएर आज घर फर्केका छन्।
जिल्ला अस्पताल ताप्लेजुङमा उपचार गराइरहेका उनी कोरोना जितेर घर फर्केका हुन्। पुनः परीक्षणपश्चात कोरोना भाइरसको रिपोर्ट नेगेटिभ आएपछि उनीलाई घर फर्काइएको अस्पतालका प्रमुख डा. सोनिङ लामाले जानकारी दिए।
दमको रोगबाट पीडित ती वृद्धलाई कोरोना पुष्टि भएपछि असोज ७ गते अस्पताल भर्ना गरिएको थियो। कोरोना रोग निको भएर घर फर्कनेमा ताप्लेजुङका फक्ताङलुङ निवासी रहेको बताइएको छ।
सोमबार जिल्ला अस्पताल ताप्लेजुङमा ती वृद्धसहित अर्का १ गरी २ जना कोरोना संक्रमितलाई डिस्चार्ज गरिएको छ । नयाँ १ जनामा कोरोना संक्रमण पुष्टि भएपछि उनलाई अस्पतालको आइसोलेशनमा राखेर उपचार गरिएको अस्पतालका प्रमुख डा. सोनिङ लामाले केटिएम दैनिकलाई बताए ।
स्वास्थ्य तथा जनसंख्या मन्त्रालयले सोमबार दिउँसो सार्वजनिक गरेको तथ्यांक अनुसार नेपालमा कोरोना संक्रमितको संख्या ८९ हजार २ सय ६३ पुग्दा ७३ दशम्लव शून्य ५ प्रतिशत अर्थात ६५ हजार २ सय २ कोरोनामुक्त भएर घर फर्किसकेका छन्।
पछिल्लो २४ घन्टामा २ हजार ४ सय ४० कोरोना संक्रमित थपिँदा १ हजार १ सय ३३ जना निको भएर घर फर्केका हुन् ।