प्रधानमन्त्री केपी शर्मा ओलीका प्रमुख सल्लाहकारसहित सचिवालयका *चार जनालाई कोरोना संक्रमण पुष्टि भएको छ। कोरोना संक्रमण पुष्टि भएकामध्ये तीनजना प्रधानमन्त्री ओलीका सल्लाहकारहरू नै रहेका छन् भने एकजना स्वकीय सचिव रहेका छन्।
प्रधानमन्त्रीका प्रमुख सल्लाहकार विष्णु रिमाल, परराष्ट्र मामिला सल्लाहकार राजन भट्टराई, प्रेस सल्लाहकार सूर्य थापा र स्वकीय सचिव इन्द्र भण्डारीलाई संक्रमण देखिएको हो। उनीहरूले आफूलाई संक्रमण पुष्टि भएको बारेमा सामाजिक सञ्जालमार्फत जानकारी दिएका छन्।
हिजोको PCR परीक्षणबाट
म मा पनि कोरोना- पोजिटिभ
देखियो। यस बीच मसंग सम्पर्कमा आउनु भएका सबै माहानुभवले आफ़्नो स्वास्थ्यको ख्याल गर्नुहुन आग़्रह गर्दछु। pic.twitter.com/HmsQqPom1j— Bishnu Rimal (@BishnuRimal) October 3, 2020
यसअघि प्रधानमन्त्रीको सचिवालयमा कार्यरत राजन काफ्ले र निजी चिकित्सक दीव्या सिंहलाई पनि कोरोना पुष्टि भएको थियो। प्रधानमन्त्री केपी शर्मा ओलीको कोरोना परीक्षण रिपोर्ट नेगेटिभ आएको छ। शुक्रबार पीसीआर परीक्षणका लागि प्रधानमन्त्री ओलीको पनि नमुना संक्रलन गरिएको थियो।
* सच्चाइएको