काठमाडौँ महानगरपालिकामा कोरोना भाइरस सङ्क्रमितको सङ्ख्या करिब १० हजार पुगेको छ ।
कामपामा हालसम्म ९ हजार ८ सय २५ जना कोरोना भाइरसबाट सङ्क्रमण भएका छन् ।
होम आइसोलेसनमा बस्नेको सङ्ख्या २ हजार ९ सय ९० रहेको छ । अस्पतालमा उपचार गराइरहेका ५ सय ७२ र संस्थागत आइसोलेसनमा ५ सय ८३ रहेका छन् ।
संक्रमितमध्ये ५ हजार ५ सय ९ जना निको भएर घर फर्किसकेको कामपा शहरी स्वास्थ्य महाशाखाले जनाएको छ । महाशाखाका अनुसार कोरोना सङ्क्रमणको कारण ८० जनाको मृत्यु भएको छ ।
सरकारले भने अनुरुप पछिल्लो समय भौतिक दूरी कायम र मास्कको समुचित प्रयोगमा हेलचक्र्याइँ बढेपछि काठमाडौँ उपत्यका कोरोना भाइरस सङ्क्रमणको केन्द्र बनेको छ । उपत्यकासहित देशभर व्यक्ति–व्यक्तिबीच भौतिक दूरी कायम निकै न्यून मात्रामा हुने गरेको छ भने अधिकांशले मास्कको सही प्रयोग नगर्दा जोखिम अत्यधिक बढिरहेको छ ।
अहिले कामनपामा सक्रिय संक्रमितको संख्या ४ हजार १ सय ४६ छ । शुक्रबार मात्रै काठमाडौं जिल्लामा १ हजार २ सय ८० संक्रमित फेला परेका थिए । एकैदिनमा यति धेरै संख्यामा कोरोना संक्रमित भेटिएको यो अहिलेसम्मकै सर्वाधिक बढी हो ।
