पूर्व राष्ट्रपति डाक्टर रामवरण यादवले १९ दिनदेखि अनशनरत डाक्टर गोविन्द केसीको स्वास्थ्य अवस्था बुझ्न शिक्षण अस्पताल पुगेका छन् ।
चिकित्सा शिक्षा सुधारको मागसहित १९ औं पटकको सत्याग्रहमा बसेका डा. केसीलाई भेट्न पूर्वराष्ट्रपति यादव शिक्षण अस्पताल महाराजगन्ज पुगेका हुन् ।
सो क्रममा डा. यादवले केसीलाई भेट्नुका साथै उनको उपचारमा संलग्न चिकित्सकहरुसँग स्वास्थ्य अवस्थाबारे जानकारी लिएका छन् ।
डा. केसीले १९ औं पटक सत्याग्रह थालेको आज १९ दिन पुगेको छ । भदौं २९ गते जुम्लाको चन्दननाथ नगरपालिका-६ रानिचौरमा रहेको बाविरा मन्दिरमा १९औँ सत्याग्रहको सुरुवात गरेका थिए ।
भदौं २९ देखि अनशनमा रहेका केसीको स्वास्थ्य अवस्था कमजोर हुँदै गएपछि असोज ६ गते उपचारका लागि काठमाडौं ल्याइएको थियो ।
त्यसपछि उनले त्रिवि शिक्षण अस्पताल महाराजगन्जमै सत्याग्रह गरिरहेका छन् । उनको स्वास्थ्य अवस्था जटिल बन्दै गए पनि सरकारले अहिलेसम्म वार्ताको कुनै पहल गरेको छैन ।
हिजो मात्रै सरकारका प्रवक्ता प्रदीप ज्ञवालीले अहिले समय सत्याग्रह गर्ने नभएकाले फिर्ता लिन आग्रह गरेका थिए । मन्त्रि ज्ञवालीले मन्त्रिपरिषद् बैठकका निर्णय सार्वजनिक गर्ने भनेका थिए “देश संकटमा छ। कोरोना विरुद्धको लडाइमा जुधिरहेका धेरैलाई हामीले गुमाएका पनि छौं। यस्तो बेला अनसन र हडताल राम्रो विषय भएन। अरु मागमा पछि पनि छलफल गर्न सकिन्छ। सरकार डा केसीलाई अनसन फिर्ता लिन आग्रह गर्छ।”
यसअगाडी बुधबार पूर्वप्रधानमन्त्री पूर्वप्रधानमन्त्री तथा जनता समाजवादी नेपालका नेता डा. बाबुराम भट्टराईले अनसनरत् डाक्टर गोविन्द केसीलाई भेटेका थिए । टिचिङ अस्पतालमा अनसनरत् डाक्टर केसीलाई भेट्न पत्नी हिसिला सहित पुगेको तस्विर उनले ट्विटरमार्फत सार्वजनिक गरेका थिए ।