कोरोना भाइरस (कोभिड–१९) को संक्रमणबाट कर्णाली प्रदेश अस्पतालका वरिष्ठ चिकित्सक डा. हरिप्रसाद सापकोटाको बिहीबार दिउँसो निधन भएको छ।
दुई सातादेखि नेपालगन्जस्थित भेरी अस्पताल नेपालगन्जमा उपचाररत वरिष्ठ हार्डजोर्नी रोग विशेषज्ञ सापकोटाको आज दिउँसो करिब ३ बजे निधन भएको हो।
प्रदेश अस्पतालका निर्देशक डा. डम्बर खड्काका अनुसार मधुमेह र उच्च रक्तचापका बिरामीसमेत रहेका सापकोटालाई सुरुदेखि नै आईसीयूमा अक्सिजन दिएर राखिएको थियो। निधन भएको खबर पाएसँगै डा. खड्कासहितको टोली आजै नेपालगन्जतर्फ गएको बताइएको छ।
५८ वर्षीय डा.सापकोटा ११औं तहका सरकारी डाक्टर हुन्।
यसअघि नेपालमा २ जना स्वास्थ्यकर्मीको कोरोनाबाट ज्यान गएको पुष्टि भए पनि विशेषज्ञ चिकित्सकको ज्यान गएको यो पहिलो घटना हो।
वरिष्ठ विशेषज्ञको निधनसँगै कर्णालीमा कोरोनाबाट निधन हुनेको संख्या ८ पुगेको छ।