सोमबार १३ सय ५० भन्दा बढी संक्रमित थपिएका छन् ।
स्वास्थ्य तथा जनसंख्या मन्त्रालयका प्रवक्ता डा जागेश्वर गौतमका अनुसार देशभरका प्रयोगशालामा १० हजार ८० जनाको नमूना परिक्षण गर्दा काठमाडौं उपत्यकामा ८ सय १७ सहित मुलुकभर १ हजार ३ सय ५१ जनाको नमूना पोजेटिभ आएको छ ।
योसहित नेपालका कोरोना संक्रमितको कूल संख्या ७४ हजार ७ सय ४५ पुगेको छ ।
संक्रमितमध्ये ५४ हजार ६ सय ४० जना कोरोनामुक्त भएर घर फर्किसकेका छन् भने ४ सय ८१ जनाले यो भाइरसको कारण ज्यान गुमाएका छन् ।
पछिल्लो २४ घन्टामा मात्र ४ जनाको ज्यान गएको छ भने ७ सय ४२ जना निको भएका छन् ।
आज थपिएका संक्रमितमध्ये काठमाडौं जिल्लामा ६ सय ४९ भक्तपुरमा ३६ र ललितपुरमा १ सय ३२ गरि उपत्यकामा ८ सय १७ संक्रमित थपिएका हुन् ।
आजको आँकडा हेर्नेहो भने देशभर भेटिएका संक्रमितमध्ये उपत्यकामा तीन जिल्लामा भेटिएका संक्रमितको प्रतिशत ६०.४८ छ । यसले उपत्यकामा कोरोनाको जोखिम उच्च रहेको स्पष्ट पार्दछ ।
अहिले सक्रिय संक्रमितको संख्या १९ हजार ६ सय २४ छ । स्वास्थ्य मन्त्रालयले सक्रिय संक्रमितको संख्या २५ हजार नाघेपछि सरकारलाई लकडाउन गर्न सुझाव दिएको छ । तर मानिसहरु भने परिक्षणको संख्या बढाउने हो भने सक्रिय संक्रमितको संख्या २५ हजार पुग्न १ वा २ दिन लाग्ने बताउँछन् ।
होम आइसोलेशनमा बस्ने बढी
सक्रिय कोरोना संक्रमितमध्ये होम आइशोलेसनमा बस्नेको संख्या बढि छ । सोमबारसम्म १० हजार ९ सय २९ जना होम आइशोलेसनमा बसेका छन् भने ८ हजार ६ सय ९५ जना संस्थागत आइसोलेशनमा बसेको कोभिड १९ राष्टिय अध्यावधिक विवरणमा उल्लेख छ ।
केहीको अवस्था जटिल
कोरोना संक्रमितमध्ये ३१ जनाको अवस्था निको नाजुक रहेको छ । उनीहरुलाई भेन्टिलेटरमा राखेर उपचार गरिएको मन्त्रालयले जनाएको छ । यसरी भेन्टिलेटरमा राख्नुपर्ने विरामीमा बाग्मती प्रदेशमा सबैभन्दा बढी २६ जना छन् भने प्रदेश १ मा ३ जना र प्रदेश ५ मा २ जना रहेको मन्त्रालयले तथ्यांकमा उल्लेख छ ।
त्यस्तै २ सय २५ जनालाई आइसीयूमा राखेर उपचार भैरहेको बताइएको छ । जसमा सबैभन्दा धेरै बागमती प्रदेशमा १ सय २१ जना प्रदेश ५ मा ४४ जना प्रदेश २ मा २० जना कर्णाली प्रदेशमा १९ जना र गण्डकी प्रदेशमा ६ जना रहेका छन् । सुदुरपश्चिम प्रदेशमा रहेका संक्रमितहरुलाई आइसीयूको आवश्यकता परेको छैन ।