प्रेस काउन्सिल नेपालका कार्यवाहक अध्यक्षमा गोपाल बुढाथोकी चयन हुनुभएको छ ।
कार्यवाहक अध्यक्ष किशोर श्रेष्ठले पदबाट राजीनामा दिएपछि बोर्ड बैठकले बुढाथोकीलाई अध्यक्षमा चयन गरेको हो ।
साँघु साप्ताहिकका सम्पादक बुढाथोकीले शुक्रबार नै पदभार ग्रहण गरेका छन् । यसअघि किशोर श्रेष्ठले काउन्सिलको स्वायत्तताको रक्षा र निरन्तरताको निम्ति प्रेस काउन्सिल बोर्ड बैठकसमक्ष राजीनामा पत्र बुझाएका हुन् ।
श्रेष्ठको पदावधि आउँदो १२ गते सकिँदैछ ।
साँघु साप्ताहिकका प्रकाशक/सम्पादक रहेका बुढाथोकी करिब चार दशकदेखि पत्रकारितामा सक्रिय छन् ।
केही समयअगाडी दुर्गा भण्डारीलाई कार्यवाहक अध्यक्ष बनाउने सरकारको निर्णयविरुद्ध प्रेस काउन्सिल बोर्डले सर्वोच्च अदालतमा रिट दर्ता गरेको थियो । काउन्सिल बोर्डले कार्यबहाक अध्यक्ष तोक्ने अधिकार आफ्नो मात्र भएको जिकिर गर्दै सरकारले क्षेत्राधिकार मिचेको दावीसहित सर्वोच्चमा पुगेको थियो, सर्वोच्चले काउन्सिलको पक्षमा निर्णय गरेपछि दुर्गा भण्डारीको पद खारेज भएर श्रेष्ठ नै कार्यवाहक अध्यक्ष कायम रहेका थिए ।
काउन्सिलले नयाँ कार्यावाहक अध्यक्ष घोषणा गरेतापनि नेपाल प्रेस काउन्सिलको वेवसाइटमा भने किशोर श्रेष्ठकै तस्विर राखिएको छ ।