स्वास्थ्य मन्त्रालयले सक्रिय सङ्क्रमितको सङ्ख्या २५ हजार नाघेमा लकडाउन गर्न सिफारिस गरेको छ ।
आज स्वास्थ्य मन्त्रालयको नियमित प्रेस ब्रिफिङमा मन्त्रालयका प्रवक्ता डा. जागेश्वर गौतमले इन्सिडेन्ट कमाण्ड सिष्टम (आइसीएस) को बैठक बसेर २५ हजार सक्रिय संक्रमित नाघेमा लकडाउनको सिफारिश गर्ने निर्णयबारे जानकारी दिएका हुन् । आइसीएसले २५ हजारभन्दा बढी संक्रमित भएमा बन्दाबन्दी गर्न सिफारिश गर्ने निर्णय गरेको छ ।
डा. गौतमका अनुसार २५ हजारभन्दा बढी सक्रिय संक्रमित भएमा स्वास्थ्य सम्बन्धी निकायले व्यवस्थापन गर्न कठिन हुने बताए । अहिले देशमा १७ हजार ४ सय १४ सक्रिय संक्रमित छन् । अब ७ हजार सक्रिय संक्रमित थपिएमा लकडाउनको सम्भावना रहेको छ ।
विभिन्न अस्पताल र प्रयोगशालाहरुले तोकिएभन्दा बढी शूल्क लिने गरेकोमा स्वीकृति दिने निकायले कडाइका साथ अनुगमन गरी कारबाही गर्न पनि मन्त्रालयले निर्देशन दिएको छ ।
यसअघि गएको चैत ११ गतेदेखि लगाइएको लकडाउन साउन ६ गते मध्य रातिबाट हटाइएको थियो । बुधबारसम्म नेपालमा १७ हजार चार सय ११ जना सक्रिय सङ्क्रमित आइसोलेशनमा रहेका छन् । यस्तै ७ हजार १ सय ४ जना क्वरेन्टिनमा रहेको मन्त्रालयले जनाएको छ ।