नेपाल कम्युनिष्ट पार्टी (नेकपा)ले केन्द्रीय कमिटी सदस्य र पार्टीका पूर्णकालीन कार्यकर्ताहरुलाई नियमित रुपमा आर्थिक सहयोग दिने एजेन्डा छलफलका लागि सचिवालयमा पेश गरेको छ ।
आज पेरिसडाँडामा बसेको सचिवालय बैठकमा पार्टीका केन्द्रीय सदस्यहरुलाई आर्थिक सहयोग दिने एजेन्डासमेत छलफलका लागि पेश गरिएको बताइएको हो ।
आजको बैठकमा मन्त्रिपरिषद पुनर्गठनको एजेन्डामाथि छलफल भएको थियो । सोमबार (भोलि) दिउँसो १ बजे पेरिसडाँडामै बस्ने सचिवालय बैठकमा सांगठनिक एकीकरणका बाँकी काम र केन्द्रीय सदस्यलाई नियमित आर्थिक सहयोग गर्नेजस्ता एजेन्डामाथि छलफल हुने जनाइएको छ ।
प्रवक्ता नारायणकाजी श्रेष्ठका अनुसार केन्द्रीय कमिटी सदस्यलाई नियमित रूपमा आर्थिक सहयोग गर्ने एजेन्डा पनि छलफलका लागि राखिएको छ । त्यस्तै, उनका अनुसार प्रदेश जिल्ला वा त्योभन्दा तलको हकमा सम्बन्धित कमिटीहरूले नै आर्थिक सहयोग दिने वा नदिने भन्नेबारे छलफल गर्नेछन् ।
यसका साथै कोरोना महामारी रहेकोले संघीय संसदका सांसद बैठक भत्ता के गर्ने ? भन्ने विषयमा पनि सचिवालयले छलफल गरेर निर्णय लिने बताइएको छ ।
