विश्वभरी कोरोना भाइरस संक्रमितको संख्या ३ करोड सात लाख नाघेको छ ।
चीनको वुहानमा गत वर्ष पहिलो पटक देखिएको कोरोनाभाइरसबाट हालसम्म मृत्यु हुनेहरूको संख्या ९ लाख ५६ हजार नाघेको छ । यद्यपी विश्वमा कोरोना भाइरस लागेका २ करोड २३ लाख ४६ हजार ९ सय ९२ व्यक्ति कोरोनालाई जितेर घर फर्किसकेका छन् ।
कोरोना भाइरसबाट विश्वमै सबैभन्दा धेरै संक्रमण र मृत्यु अमेरिकामा भएको छ । हालसम्म अमेरिकामा ६९ लाख २५ हजार ९ सय ४१ भन्दा बढी सङ्क्रमित भएका छन् भने २ लाख ३ हजार १ सय ७१ जनाको मृत्यु भएको छ । दोस्रो धेरै संक्रमित भारतका छन् भने तेस्रो बढी सङ्क्रमित रहेको देश ब्राजिल हो ।
मृतकको संख्याको हिसाबले ब्राजिल दोस्रो स्थानमा छ भने भारत तेस्रो स्थानमा छ । भारतमा कोरोनाभाइरस सङ्क्रमितको संख्या ५३ लाख नाघेको छ । एक हप्तादेखि भारतमा दैनिक ९० हजार भन्दा बढी संक्रमित थपिँदै गइरहेका छन् । ब्राजिलमा १ लाख ३५ हजार ८ सय ५७ जनाले कोरोनाभाइरसबाट ज्यान गुमाएका छन् भने भारतमा हालसम्म ८५ हजर ६ सय २५ जनाको मृत्यु भएको छ । रुस १० लाख ९७ हजार २ सय ५१ संक्रमितसहित चौथो स्थानमा छ भने पाँचौँ स्थानमा रहेको पेरुमा ७ लाख ५६ हजार ४ सय १२ व्यक्ति संक्रमित छन्।
विश्व स्वास्थ्य संगठनका अनुसार कोरोनाभाइरसबाट हालसम्म सबैभन्दा नराम्ररी प्रभावित देशका रूपमा अमेरिका, भारत र ब्राजिल रहे पनि पछिल्ला हप्तामा युरोपमा बढ्दो क्रममा सङ्क्रमण देखिएको छ ।