उद्योग वाणिज्य आपुर्ति तथा उपभोक्ता हित संरक्षण विभागले प्याज र आलुमा कालोबजारी गर्ने एक जनालाई ५० हजार रुपैयाँ जरिवाना तोकेको छ ।
कालीमाटी फलफूल तथा तरकारी बजारका एक व्यापारीलाई आज विभागबाट खटिएको टोलीले ५० हजार रुपैयाँ जरिवाना गरेको हो ।
यस्तै, विभागले चन्द्रागिरी नगरपालिका ८ को एक ग्यास स्टोरलाई कागजसहित विभागमा उपस्थित हुन पनि आदेश दिएको छ ।
प्याज र आलु बजार मूल्यभन्दा बढीमा बिक्री गरेको पाइएकोले ५० हजार रुपैयाँ जरिवाना गरिएको विभागले जनाएको छ । केही दिनदेखि बजारमा प्याजको मुल्य आकासिएको छ । भारतले प्याज निर्यातमा प्रतिबन्ध लगाएपछि प्याजको मुल्य नेपाली बजारमा ह्वात्तै बढेको हो ।
बुधबार मात्रै काठमाडौं महानगरपालिकाको अनुगमन टोलीले कोटेश्वरबाट प्याजको कालोबजारी गरेको आरोपमा केही व्यापारीलाई पक्राउ गरेको छ ।