गण्डकी प्रदेशमा आज बिहान मात्र ६५ जनामा कोरोना संक्रमण पुष्टि भएको छ । प्रदेश स्वास्थ्य निर्देशनालयको पछिल्लो जानकारीअनुसार संक्रमित सबै कन्ट्याक्ट ट्रेसिङका आधारमा पहिचान भएका हुन् । यससँगै गण्डकीमा हालसम्म २ हजार ९ सय ६८ जनामा कोरोना पुष्टि भएको छ ।
प्रदेशको पछिल्लो अपडेटमा थप २९ जनामा कोरोना पुष्टि भएसँगै एकै दिन ६५ पुगेको हो । तीमध्ये लमजुङको सुन्दरबजार १०, नवलपुरको विनयी त्रिवेणी ६, तनहुँको व्यास एक, म्याग्दे चार, स्याङ्जाको गल्याङ एक तथा गोरखाको गोरखा नगरपालिका तथा भीमसेन गाउँपालिकामा सात गरी २९ जनामा कोरोना पुष्टि भएको हो ।
त्यसैगरी प्रदेशमा ५ सय ६१ जना क्वारेन्टिनमा रहेका छन् भने सक्रिय संक्रमित १ हजार १८ छन् । आजसम्म १ हजार ८ सय ६१ निको भएर घर फर्किएका छन् ।
गण्डकीमा हालसम्म २४ जनाको कोरोनाका कारण मृत्यु भएको छ ।