वितेको २४ घन्टामा काठमाडौं जिल्लामा मात्रै ६२० संक्रमित भेटिएका छन् ।
स्वास्थ्य तथा जनसंख्या मन्त्रालयले शुक्रवार सार्वजनिक गरेको गत २४ घन्टाको जिल्ला अनुसार पीसीआर परिक्षणको नतिजामा काठमाडौं जिल्लामा १९४ महिला र ४२६ पुरुष गरी जम्मा ६२० जनामा संक्रमण देखिएको हो ।
यो तथ्यांक अहिलेसम्मकै बढी हो ।
त्यस्तै उपत्यकाका अन्य २ जिल्ला भक्तपुर र ललितपुरमा ३८-३८ जना गरी उपत्यकामा आज ६ सय ९६ जना संक्रमित फेला परेका हुन् ।
कोरोना परिक्षण सहज बनाउने र ठूलो संख्यामा उपत्यकामा परिक्षण गर्ने हो भने दैनिक ४ अंक (१ हजार वा सोभन्दा बढी) संख्यामा कोरोना संक्रमित फेला पर्ने जनस्वास्थ्य विज्ञहरु बताउँदै आएका छन् ।
स्वास्थ्य तथा जनसंख्या मन्त्रालयका प्रवक्ता डा जागेश्वर गौतमका अनुसार पछिल्लो २४ घन्टामा देशभरी रहेका प्रयोगशालामा १० हजार ७ सय १ जनाको नमूना परिक्षण गर्दा १ हजार ४ सय ५४ जनामा कोरोना संक्रमण पुष्टि भएको हो ।
योसँगै नेपालमा संक्रमित हुनेको संख्या ५१ हजार ९ सय १९ पुगेको छ ।
मन्त्रालयका अनुसार नेपालमा कोरोनाभाइरस सङ्क्रमणबाट मुक्त हुने दर लगभग ७१ प्रतिशत छ।
