काठमाडौं उपत्यकाका तीन जिल्लामा कोरोना संक्रमितको संख्या लगभग ९ हजार पुगेको छ ।
स्वास्थ्य तथा जनसंख्या मन्त्रालयका बुधबार सार्वजनिक गरेको तथ्यांकअनुसार काठमाडौंका तीन जिल्लामा कोरोना संक्रमितको संख्या ८ हजार ९ सय ७६ पुगेको छ । सबैभन्दा बढी काठमाडौं जिल्लामा ४ हजार ८ सय ३० पुरुष र २ हजार ३ सय ८७ महिला गरी ७ हजार २ सय १७ जना, भक्तपुर जिल्लामा ४ सय ५८ पुरुष र ३ सय २४ महिला गरी ७ सय ८२ जना र ललितपुरमा जिल्लामा ५ सय ३८ पुरुष र ४ सय ३९ महिला गरी ९७७ जनामा कोरोना भाइरस संक्रमण भएको तथ्यांक मन्त्रालयले उपलव्ध गराएको छ ।
बुधबारसम्म उपत्यकामा ३ हजार ७ सय ३८ संक्रमितहरु कोरोनामुक्त भएर अहिले ५ हजार २ सय ३८ जना सक्रिय संक्रमित रहेको बताइएको छ । देशभर कुल संक्रमितको संख्या ४८ हजार १ सय ३८ लाई १०० प्रतिशत मान्दा उपत्यकाको संक्रमित प्रतिशत १८ दशमलव ६५ प्रतिशत हुन आउँछ ।
काठमाडौं उपत्यकाको जनसंख्या ४० लाख आसपास भएको बताइन्छ । देशको कुल जनसंख्यालाई हेर्दा यो संख्या १३ दशमलव ३४ प्रतिशत हुन आउँछ । तर यहाँ संक्रमितको प्रतिशत १८ भन्दा बढी हुनाले उपत्यकामा संक्रमित धेरै भएको जनस्वास्थ्य विज्ञहरुले बताउँदै आइरहेका छन् ।