सरकारी संस्थाले पदपूर्तिका लागि विज्ञापन खुलाए पश्चात परीक्षा समिति गठन गरी लिखित परीक्षा संचालन गर्नुपर्ने र लिखित परीक्षामा उर्तिण भएका उमेद्वारलाई मौखिक परीक्षामा सामेल गराई छनोट गर्नुपर्ने लोकसेवा आयोगका प्रावधान छ । तर बीपी कोइराला स्वास्थ्य विज्ञान प्रतिष्ठान धरानले लिएको स्टाफ नर्सको परीक्षामा नेपाल कम्युनिस्ट पार्टी (नेकपा) सुनसरीले १९ जनाको नाम सिफारिस गरेको खुलासा भएको छ।
प्रतिष्ठानले कोभिड अस्पताल संचालनका लागि बिरामीको उपचारमा खट्ने ५० जना नर्सलाई भर्ती गर्न विज्ञापन खुलाइएको थियो। त्यसमध्ये १९ जनाको नाम नेकपाले सिफारिस गरेको हो।
प्रतिष्ठानका पदाधिकारीको मिलेमतोमा लिखित परीक्षा नै संचालन नगरी फाराम भरेका उमेद्वारलाई मौखिक परीक्षा मात्र लिएको छ। मौखिक परीक्षा अर्थात् अन्तवार्ता सोमबार सकिएको छ।
नर्सको मौखिक परीक्षा सकिने बित्तिकै नेकपा सुनसरीका नेताले छलफल गरेर परीक्षामा सामेल भएका १९ जनाको नाम प्रतिष्ठानका रजिष्ट्रारलाई सिफारिस गरेका छन्। नेकपाले स्टार्फ नर्स भर्तीका लागि प्रतिष्ठानका पदाधिकारीलाई दबाब दिएपपछि अन्तिम नतिजा निष्पक्ष हुनेमा अन्य उमेद्वारले शंका गरेका छन्।
नेकपा धरानका सचिव सुदर्शन श्रेष्ठले पार्टीका साथीसंग सल्लाह गरेरै स्टाफ नर्स भर्तीका लागि १९ जनाको नाम सिफारिस गरिएको स्वीकार गरेका छन्।
