देशका ७७ जिल्लामध्ये ६ जिल्ला कोरोनामुक्त भएका छन् ।
ती जिल्लामा अहिले सक्रिय संक्रमितको संख्या सुन्य भएसँगै कोरोनामुक्त जिल्लाको रुपमा घोषणा गरिएको स्वास्थ्य तथा जनसंख्या मन्त्रालयले जनाएको छ ।
मन्त्रालयका अनुसार सङ्क्रमितको शून्य सङ्ख्या भएका जिल्ला ताप्लेजुङ, सोलुखुम्वु, मुगु, मुस्ताङ, डोल्पा र हुम्ला रहेका छन् ।
११ जिल्ला कोरोनाको हटस्पट
६ वटा जिल्ला कोरोनामुक्त भैरहँदा देशका ११ जिल्ला कोरोनाको हटस्पट बनिरहेका छन् ।
स्वास्थ्य तथा जनसंख्या मन्त्रालयले दैनिक सार्वजनिक गर्ने स्थीति प्रतिवेदनका अनुसार मोरङ, सुनसरी, धनुषा, पर्सा, बारा, रौतहट, सर्लाही, काठमाडौं, ललितपुर, चितवन र रुपन्देही संक्रिय कोरोना संक्रमितको संख्या ५ सय भन्दा बढी रहेको छ ।
काठमाडौंमा मात्रै संक्रिय संक्रमितको संख्या ५ हजार भन्दा बढी रहेको मन्त्रालयको प्रतिवेदनमा उल्लेख छ । प्रतिवेदनका अनुसार काठमाडौंमा ५ हजार १ सय ७४ संक्रमित हुँदा ललितपुर जिल्लामा ६ सय ८० संक्रिय संक्रमित रहेका छन् ।
आज कोरोना संक्रमितभन्दा निको हुने बढी
शनिबार नेपालमा कोरोना संक्रमितको संख्या भन्दा कोरोनामुक्त हुनेको संख्या बढी रहेको छ ।
वितेको २४ घण्टामा कोरोनामुक्त भई घर फर्किनेको सङ्ख्या १ हजार ५ सय ६६ छ । जवकी नयाँ थपिएका संक्रमितको संख्या १ हजार ४१ मात्र छ । कोभिड–१९ बाट मुक्त हुनेको सङ्ख्या औषतमा ६० प्रतिशत छ ।
मन्त्रालयका अनुसार गत २४ घण्टामा काठमाण्डौँ उपत्यकामा ४ सय ८ सहित देशभर १ हजार ४१ जनामा कोरोना सङ्क्रमण देखिएको छ ।
