नेपालमा कोरोना संक्रमण सुरु भएदेखि विभिन्न बीमा कम्पनीहरुले कोरोना बीमा गरिरहेका छन । एक बर्षका लागि गरिएको कोरोना बीमा कोरोनाको रिपोर्ट पोजेटिभ आएको खण्डमा दाबी गर्न सकिन्छ ।
तर निजी ल्याबमा कोरोना परीक्षण गराई पोजेटिभ देखिएमा बिमा कम्पनीहरुले दाबी भुक्तानी नगर्ने भएका छन् । पछिल्लो समय खुलेका निजी ल्याबहरुले बदमासी गरेर नेगेटिभ देखिएका बिरामीहरुलाई पनि पोजेटिभ भएको भन्दै रिपोर्ट बुझाएर भुक्तानी दाबी गरेको पाइएको भन्दै बिमा समितिले यसमा अंकुश लगाएको हो । समितिले निजी ल्याबमा गरेको परीक्षणबाट पोजेटिभ देखिएमा भुक्तानी नगर्न बिमा कम्पनीहरुलाई सर्कुलर जारी गरेको छ ।
बिमा भुक्तानीका लागि निजी ल्याबहरुले मिलेमतो गरी पोजेटिभ रिर्पोट बनाएर फर्जी काम गरेको फेला परेपछि दाबी भुक्तानीमा कडाई गरिएको समितिले जनाएको छ । ‘कोभिडको दाबी भुक्तानी दिँदा स्वास्थ्य मन्त्रालय अन्तर्गतका ल्याब तथा अस्पतालमा भएको परीक्षण रिपोर्टका आधारमा मात्रै दिनू होला’ समितिले कम्पनीहरुलाई दिएको निर्देशनमा भनिएको छ ।
कोरोना बीमा मापदण्ड २०७७ मा स्वास्थ्य मन्त्रालय अन्तर्गतका निकायबाट पीसीआर परीक्षण गर्दा कोरोना भाइरस संक्रमण देखिएको प्रमाण पेश भएमा ७ दिनभित्र दाबी भुक्तानी गर्नुपर्ने उल्लेख छ । अहिलेको व्यवस्था अनुसार १ लाख ५० हजारका बीमालेखहरु छन् । १ लाखको बीमा गर्दा व्यक्तिगत १ हजार र पारिवारिक तथा संस्थागत ६ सय रुपैँयाँ लाग्छ । त्यस्तै, ५० हजारको बीमा गर्दा प्रतिव्यक्ति ५ सय र पारिवारिक गर्दा ३ सय रुपैँयाँ लाग्छ ।
कोरोना पोजेटिभ देखिने बित्तिकै भुक्तानी पाउने भएकाले पछिल्लो समय धेरैले यस्ता फर्जी रिपोर्टहरु बनाइएको तथ्य खुलेपछि बिमा समितिले कडाई गरेको हो ।
हाल कोरोना भाइसरको पीसीआइ परीक्षण ४७ वटा सरकारी ल्याव र १३ वटा निजी ल्यावबाट भइरहेको छ । यसबाहेक पनि पछिल्लो समय केही निजी अस्पताल र ल्याबहरुले सस्तो शुल्कमा कोरोना परीक्षण गराइरहेका छन् ।
समितिद्वारा जारी निर्देशिकाअनुसार हाल परीक्षण गराइरहेका ४७ वटा सरकारी निकायका ल्यावको रिपोर्टबाट मात्र कोरोना दाबी पाइन्छ ।
हालसम्म नेपालमा कोरोना संक्रमितको संख्या ४२ हजार ८७७ जना पुगेको छ । गत बैशाखबाट शुरु भएको कोरोना बीमा ९ लाख ४० हजार बढीले गराइसकेका छन् ।
जसमध्ये १४६७ जनाले कोरोना दाबी कम्पनीहरुमा परेको छ । जसमध्ये २३९ जनालाई कम्पनीहरुले दाबी भुक्तानी गरिसकेकोे नेपाल बीमक संघका महासचिव चंखी क्षेत्रीले बताए ।
कोरोना बीमा के हो ?
कोरोना भाइरसको जोखिम बढेपछि सबै बीमा कम्पनीहरु मिलेर सामूहिक रुपमा जोखिम बहन गर्ने गरी सामाजिक सेवाको उद्देश्यका साथ बीमा समितिले सुरु गरेको एक प्रकारको लघु बीमा योजना हो ।
यो बीमा योजना स्वास्थ्य उपचार बीमा होइन । यो महामारीमा न्यूनतम शुल्कमा जनतालाई राहत दिन ल्याइएको बीमा योजना हो । जन्मेको तीन महिनादेखि ९९ वर्षसम्मका मानिसको कोरोना बीमा गर्न सकिन्छ । कोरोना बीमाको अण्डरराईटिङ हुँदैन । अण्डरराईटिङ आवश्यक नपर्ने भएकाले यस्तो बीमा पोलिसी अनलाईनबाट सिधैं भुक्तानी गरी खरिद गर्न मिल्छ ।