१४औं महाधिवेशनको मिति नजिकिएसँगै कांग्रेसमा मोर्चाबन्दी सुरु भएको छ । आसन्न फागुन पहिलो साता हुने भनिएको महाधिवेशनका लागि नेताहरुले मोर्चाबन्दी सुरु गरेका हुन् । गुटगत मोर्चाबन्दीमा रहेका नेताहरुले खुलेरै एकअर्काको विरोध गर्न थालेका छन् । सभापतिका आकांक्षी देखिएका दर्जन हाराहारीमा नेताहरु देखिएका छन् । उनीहरु सबैले आन्तरिक छलफल तिब्र बनाएका छन् ।
आन्तरिक छलफल र गुटगत भेलामा नेताहरु अर्को पक्षप्रति आरोप प्रत्यारोपमै उत्रिन थालेका छन् । यो मामलामा वर्तमान सभापति शेरबहादर देउवा र संस्थापनइतर समूहका वरिष्ठ नेता रामचन्द्र पौडेल समूह अग्र स्थानमा देखिएका छन् । सभापति देउवाले नेतृत्वमा दोहोरिनका लागि विधि, विधान र पद्धतिबाहिर गएर आफूअनुकूलका निर्णय गर्न थालेको भन्दै पौडेल समूह संस्थापनविरुद्ध चरणवद्ध आन्दोलनको तयारीमा छ ।
पौडेल पक्षले देउवाविरुद्ध धर्ना र अनशनमा उत्रने चेतावनी दिएको छ । देउवाले आफूअनुकूलको परिस्थिति बनाउन विधि, विधान र पद्धतिबाहिर गएर निर्णय गर्न थालेको पौडेल पक्षको आरोप छ। त्यसविरुद्ध पौडेल पक्षले एउटा समिति नै बनाएको थियो ।
गुरुराज घिमिरे, बद्री पाण्डे र जीवन परियार संलग्न समितिले पार्टीभित्रका गलत निर्णय र त्यसविरुद्धको प्रतिवादका कार्यक्रमसमेत सुझाएर तयार पारेको प्रतिवेदन आफ्नो समूहका नेताहरुलाई बुझाइसकेको छ । महाधिवेशनको कार्यतालिका सहित मिति तोकिसकेपछि विभिन्न नियुक्तिहरू गर्नु महाधिवेशनको आचारसंहिताको ठाडो उल्लंघन भएको भन्दै विभाग गठनका कार्य तत्काल रोकिनुपर्ने समितिको ठहर छ ।
पौडेल समूहको भर्चुअल बैठकले सभापति देउवाविरुद्ध ६ चरणका आन्दोलनका कार्यक्रम तय गरेको छ । अन्तिम चरणमा आमरण अनसन बस्नेदेखि केन्द्रीय समितिबाट राजीनामा दिनेसम्मको तयारी छन् ।
समायोजन नभएका जिल्लामा क्रियाशील सदस्यताको वितरण र नवीकरण रोकिएको निर्देशिका विपरीत गएर समायोजन गर्न खोजिएको र महाधिवेशन ढिलाइ गर्न समायोजनको कामसमेत लम्बाएको पौडेल पक्षको आरोप छ । अन्य पार्टीबाट कांग्रेस प्रवेश गरेकाहरूको समायोजनका नाममा विधानविपरीत क्रियाशील सदस्यता वितरण गरेको आरोप पौडेल पक्षले लगाउँदै आएको छ ।
प्रतिवेदनमा देउवाविरुद्ध आमरण अनशनसम्मका सम्भावित विरोधका कार्यक्रम गर्न सुझाएको छ । आमरण अनसन भने अन्तिम चरणको कार्यक्रम हो । त्यसअघि विभिन्न चरणका विरोध कार्यक्रम गर्न समितिले सुझाएको छ।
पहिलो चरणमा सभापतिलाई गलत निर्णय सच्याउन तीन दिनको अल्टिमेटम दिने, दोस्रो चरणमा संस्थापन इतरपक्षका केन्द्रीय पदाधिकारी, जिल्ला सभापति र भ्रातृ तथा शुभेच्छुक संस्थासँग अन्तक्र्रिया गर्ने, तेस्रो चरणमा पत्रकार सम्मेलन गर्ने, चौथो चरणमा जिल्ला तथा केन्द्रीय कार्यालयमा धर्ना दिने दिने र यति गर्दा पनि विधि र विधानविरुद्धका काम नसच्चिए जिल्ला तथा केन्द्रीय कार्यलयमा रिले र अन्तिममा आमरण अनशन बस्ने योजना छ ।
विधानविपरीतका सम्पूर्ण निर्णय सच्याएर नेतृत्व अघि बढ्न खोजे आफूहरू सहमतिका साथ अघि बढ्न तयार रहेको समेत पौडेल पक्षका नेताहरुको भनाइ छ । तर विधान, प्रक्रिया र पद्धतिबाहिरबाट भएका निर्णय र गतिविधि नरोके धर्ना, आमरण अनशन वा देशभरका कार्यकर्तालाई जोडेर विरोधमा उत्रने उनीहरुको तयारी छ । आवश्यक परे केन्द्रीय समितिबाट राजीनामा दिने सम्मको तयारी पौडेल पक्षले गरेको उनी निकट एक नेताले बताए ।
महाधिवेशनको मुखमा कांग्रेसमा यस्तो खालको आन्दोलनको चेतावनी र तयारी नौलो भने होइन। यसअघि १३औं महाधिवेशनमा पनि देउवाले तत्कालिन संस्थापनविरुद्ध विरोधका कार्यक्रम गरेका थिए।
र यो पनि पढ्नुहोस् :
सभापतिको ‘रेस’मा बुढाको रमिता, के गर्दैछन् युवा नेता !