केही साताअघि मात्रै फोक्सोको क्यान्सर पत्ता लागेका अभिनेता सञ्जय दत्त आगामी चरणको उपचारका लागि अमेरिका जाने तयारीमा छन् ।
यही सन्दर्भमा सञ्जयलाई पाँचवर्षे अमेरिकी भिसा प्रदान गरिएको छ ।
उनको प्रारम्भिक उपचार मुम्बईको कोकिलाबेन अस्पतालमा भइरहेको छ ।श्वासप्रश्वासमा समस्या देखिएपछि उनलाई दुई दिनसम्म लीलावती अस्पताल भर्ना गराइएको थियो ।
कोरोना संक्रमणका कारण समस्या उत्पन्न भएको आशंकामा परीक्षण पनि गरियो । तर उनको कोरोना रिपोर्ट नेगेटिभ आएपछि थप परीक्षणमा उनमा क्यान्सर भएको पत्ता लागेको हो ।
अहिले महामारी फैलिएका कारण भारतमै उपचार गराउने र स्थिति सामान्य भएसँगै अमेरिकाका लागि उड्ने दत्त परिवारको योजना भएको उनकी पत्नी मान्यताले सामाजिक सञ्जालमार्फत जनाएकी छन् ।
उनी फोक्सोको क्यान्सरको तेस्रो चरणमा भएको पनि भारतीय सञ्चारमाध्यमहरुले जनाएका छन् ।सञ्जयको पछिल्लो चलचित्र ‘सडक २’ अनलाइन रिलिजको तयारीमा छ । उनको अर्को चलचित्र ‘केजीएफ २’ छायांकनमै छ । केजीएफ २ मा सञ्जयको विशेष भूमिका भएका कारण पनि त्यसको छायांकनपछि मात्रै उनी उपचारका लागि अमेरिका जाने तयारी छ ।
उनकी आमा नरगिसलाई पनि प्याङ्क्रियाजको क्यान्सर भएको थियो । उनकी आमाको क्यान्सरकै कारण सन् १९८१ म निधन भएको थियो । सञ्जयलाई क्यान्सर भएलगत्तै सामाजिक सञ्जाल र विभिन्न मिडियाहरुबाट दर्शक र सर्वसाधारणले स्वास्थ्य लाभको कामना गरिरहेका छन् ।
सञ्जयलाई फोक्सोको क्यान्सर पुष्टि भएपछि मनिषाले यो दुखद घडीमा संयम हुन र आत्मबल दह्रो पार्न आग्रह गरेकी छिन्। सन् २०१२ मा मनिषालाई पनि चौथो स्टेजको डिम्बग्रंथिको क्यान्सर भएको थियो।
क्यान्सरलाई जितेकी मनिषाले सञ्जयलाई फोक्सोको क्यान्सर हुँदा धैर्य र बलियो रहन सन्देश पठाएकी छिन्।
मनिषाले सामाजिक सञ्जाल ट्वीटरमा लेखेकी छन्, ‘बाबा (सञ्जय दत्त) तिम्रो स्वास्थ्य अवस्थाबारे सुन्नमा आउँदा धेरै दुःख लागेको छ, मलाई थाहा छ तिमीमा धेरै शक्ति छ। पहिला पनि तिमीले जीवनका धेरै कठोर संघर्षलाई पराजित गरिसकेका छौ। मलाई आशा छ, तिमीले यस अवस्थालाई पनि जितेर फर्कने छौ। तिम्रो शीघ्र स्वास्थ्य लाभका लागि प्राथना गर्दछु ।’