नेपालमा १ करोड भन्दा बढी व्यक्तिले मोबाइल बैंकिङ्ग सेवा लिएका छन् ।
नेपाल राष्ट्र बैंकले सार्वजनिक गरेको तथ्यांकअनुसार नेपालमा १ करोड ९ लाख १ हजार २ सय ९२ व्यक्तिले मोबाइल बैंकिङ्ग सेवा लिएका छन् ।
सेवा लिएका सबै सक्रिय प्रयोगकर्ता भने होइनन् राष्ट्र बैंकको तथ्यांकअनुसार १ करोड भन्दा बढी व्यक्तिले सेवा लिएतापनि ८५ प्रतिशत अर्थात ८५ लाख ३६ हजार २ सय १५ जनाले नियमित रुपमा यो सेवा प्रयोग गरिरहेको पाइएको छ ।
१० लाख ९ हजार भन्दा बढीले इरनेट बैंकिङ्ग सेवा लिएतापनि सो सेवा प्रयोग गर्ने ग्राहकको संख्या भने आधामात्रै रहेको पाइएको छ । संख्यात्मक रुपमा हेर्ने हो भने ५ लाख ९७ हजार ९ सय ६७ ग्राहकले यो सेवा प्रयोग गरिरहेका छन् ।
त्यस्तै डेबिड कार्ड अर्थात एटिएम कार्ड लिने ग्राहकको संख्या ७२ लाख नाघेको छ । २०७७ साल असार मसान्तसम्म ७२ लाख ६५ हजार ३ सय ७३ जनाले डेबिट कार्डको सेवा लिएतापनि ४९ लाख ४६ हजार ५ सय १ जनाले मात्र सो सेवा प्रयोग गरिरहेका छन् ।
क्रेडिट कार्ड लिनेको संख्या भने न्यून छ । १ लाख ५८ हजार १ सय ४ जनाले क्रेडिट कार्ड लिएतापनि १ लाख ४ सय ८ जनाले मात्र सो सेवा नियमित रुपमा प्रयोग गरिरहेको तथ्यांक सार्वजनिक भएको छ ।
बढ्दै बैंकिङ्ग पहुँच
नेपाल राष्ट्र बैंकका अनुसार कुल ७५३ स्थानीय तहमध्ये २०७७ असारसम्म ७४७ तहमा वाणिज्य बैंकहरूका शाखा विस्तार भएका छन् । ७४७ स्थानीय निकायमध्ये प्रायः सबैमा बैंकसँगै एटीएमको पनि पहुँच पुगेको छ ।
हाल प्रायः सबै वाणिज्य बैंक मात्र नभई सहकारीले समेत एटीएमबाट ग्राहकलाई सेवा दिन थालेका छन् । एटीएमको प्रयोग व्यापक रहँदा यसको कारोबार बढेको पाइएको छ । हाल नेपालमा तीन हजार ९५० एटीएम मेसिन रहेका छन् ।
कोरोनाका कारण भएको बन्दाबन्दीका कारण बैंकहरूले डिजिटल भुक्तानीलाई प्राथमिकता दिँदा यी एटीएमबाट एक महिनामा ५४ अर्ब ७६ करोड ६३ लाख रुपियाँसम्म निकालिएको छ ।