तपाइले आफूले पैसा तिरेअनुसारको इन्टरनेटको स्पीड पाउनुभएको छैन भने अबदेखि अनलाइनबाटै उजुरी दिन सकिने भएको छ ।
नेपाल दूरसञ्चार प्राधिकरले एक पोर्टल निर्माण गरेको छ । जुन पोर्टलमा आफूले चलाएको इन्टेरनेटको स्पीड चेक गर्न सकिन्छ । यदि तपाइले पैसा तिरेर लिएको इन्टरनेटको स्पीड चित्तबुझ्दो छैन भने त्यहीबाट कम्प्लेन (उजुरी ) गर्न सक्ने व्यवस्था राखिएको छ ।
प्राधिकरणले केही महिनाअघिदेखि यो सेवा संचालनमा ल्याएको प्रवक्ता मिन प्रसाद अर्यालले केटीएम दैनिकलाई बताए । उनले थप स्पष्ट पार्दै भने “उजुरी गर्ने अरु विभिन्न माध्यम पनि छन् तर धेरै ग्राहकहरुबाट सुस्त गतिको इन्टरनेट बारे धेरै गुनासो आउन थालेपछि प्राधिकरणले यो सिस्टमको विकास गरेको हो ।”
नेपाल दुरसंचार प्राधिकरण नेपाल सरकारको नियामक निकाय हो ।
कसरी गर्ने उजुरी
यसको लागि सबैभन्दा पहिले http://103.198.9.118:8082 मा जाने ।
त्यसमा स्पीड टेस्ट गरिसकेपछि आफ्नो इन्टरनेट स्पिडसँग चित्त बुझेको छैन भने तल Complain भन्ने बटन राखिएको छ । त्यहाँ तपाईंको सम्पर्क विवरण अनि आफूले कति Mbps को Plan खरिद गरेको हो, लेख्ने र Submit गर्ने ।
ग्राहकले गरेको उजुरीको कसरी सम्वोधन हुन्छ ?
प्रवक्ता अर्यालका अनुसार ग्राहकहरुको उजुरी सुन्नको लागि प्राधिकरणमा एक छुट्टै संयन्त्र छ । उपभोक्ता अनुगमन शाखाले यसरी आएका उजुरीलाई सर्वप्रथम क्रस भेरिफाइ गर्छ ।
साँच्चिकै ग्राहक ठगिएको हो भने उक्त आइसपी (इन्टरनेट सर्भिस प्रोभाइडर) लाई ठगिको प्रकृति हेरेर सचेत गराउने वा जरिवाना तिराउने काम प्राधिकरणले गर्ने गरेको छ ।