जनता समाजवादी पार्टी (जसपा) का वरिष्ठ नेता डा.बाबुराम भट्टराईले सांसदको लोगो दुई कक्षाको बालकको स्केच जस्तो भएको प्रतिक्रिया दिएका छन्। त्यस्तो स्केच बनाएर लाखौं रुपैयाँ खर्च भए पनि कसैले जिम्मेवारी नलिएको उनको भनाइ छ।
बिहीबार ट्वीट गर्दै वरिष्ठ नेता डा.भट्टराईले सो कुरा बताएका हुन्।
केही दिन अघिदेखि नयाँ लोगोको व्यापक आलोचना भएपछि सो लोगो फिर्ता भएको छ । तर अब बन्ने नयाँ लोगोमा खर्च कस्ले गर्ने भन्ने विवाद सतह आएको छ ।
सुन र चाँदीको सम्मि श्रणबाट बनाइएको लोगोमा नक्साको स्वरूप र संघीय संसद् शब्द गलत ढंगले प्रयोग गरिएका छन् । लिम्पियाधुरासहितको नक्सा समेटेर तयार पारिएको लोगोमा मुलुकको नक्सा भने हेर्दै नेपालको जस्तो छैन । वास्तविक नक्सामा पश्चिम भाग उठेको र पूर्वी भाग अलि तल झुकेको छ । तर, लोगोमा नक्सा सीधा राखिएको छ । त्यो पनि आयतकार । यस्तै लोगोको तल्लो भागमा लेखिएको संघीय शब्दमा ‘सघीय’ मात्र छ । संसद्को द मा हलन्त दिन छुटाइएको ‘संसद’ लेखिएको छ ।
लोगोमा रहेको नेपालको नक्सा लगायतका विषय परिमार्जन गरी उपलव्ध गराउने प्रतिवद्धता घरेलु तथा साना उद्योग कार्यालय ललितपुरले जनाएपछि फिर्ता गरिएको संघीय संसद् सचिवालयले एक प्रेस विज्ञप्ती मार्फत जानकारी गराएको छ ।
लोगो बनाउँदा प्रतिलोगो ५ हजार ५ सय २७ रुपैयाँ खर्च लागेको थियो ।
उक्त लोगोमा २ लाल सुनको जलपमा १ तोला चाँदीको लेप लगाइएको थियो । पित्तलको नक्सामा चाँदीको बेस थियो । लोगोको पुछारमा रहेको दुई हातमा चाहिँ तामा प्रयोग गरिएको थियो ।
घरेलु तथा साना उद्योग कार्यालय ललितपुरका अधिकृत गणेश राउतले पुनः लोगो बनाउँदा पहिले प्रयोग भएको सुन, तामा र पित्तल पुनः प्रयोग गर्न नमिल्ने बताए । चाँदी भने त्यसकै प्रयोग गर्न सकिन्छ ।
‘नयाँ बनाउँदा तताउनुपर्छ । तताउँदा प्लास्टिक कोटेड (टल्किने) पग्लिन्छ । सुन जलप हो खेर गइहाल्छ, तामा तातोले कालो हुन्छ’ उनले भने ।
सुनको भाउ पहिले भन्दा महंगो भएकाले अब पहिलेजति लोगो बनाउँदा पनि धेरैखर्च लाग्ने बताए । ३५० थान लोगोका लागि अब ७ लाख रुपैयाँको सुन चाहिने अनुमान गरिएको छ । त्यसैगरी तामा र पित्तलसमेतको खर्च जोड्दा १० लाख रुपयाँ खर्च लाग्ने राउत बताउँछन् ।
पूर्वप्रधानमन्त्री समेत रहेका डा.भट्टराईले कोरोना भाइरसका कारण खाडी मुलुकमा अलपत्र परेका नेपाली र जिल्ला–जिल्लामा जोखिमपूर्ण वस्तीका विषयमा पनि कोही जिम्मेवार नभएको बताएका छन्। उद्धारका लागि नेपाल वायु सेवा निगमको जहाज गए पनि रित्तै फर्किएको थियो।
‘खाडीमा श्रमिक अलपत्र छन्,नेवानिको जहाज रित्तै फर्कन्छ। कोही जिम्मेवार हुन्न !’ सांसदको लोगो दुई कक्षाको बालकको स्केच जस्तो छापिन्छ। लाखौं चट् हुन्छ। कसैले जिम्मेवारी लिन्न। जिल्ला–जिल्लामा जोखिमपूर्ण बस्ती बेलैमा नसार्दा पैरोले दर्जनौं ज्यान जान्छ। कोही जिम्मेवार हुन्न। तैपनि सरकार स्वस्थ रे !’ डा.भट्टराईको ट्वीटरमा उल्लेख छ।