मुम्बई(एजेन्सी) । बलिउड अभिनेता आमिर खान टर्कीका राष्ट्रपति रेचेप तैय्यप अर्दोआनकी पत्नी एमीन अर्दोआनसँगको भेटघाटका कारण यतिबेला चर्चामा छन् । आमिरसँग भेटघाटको तस्वीरहरु एमीनले अगष्ट १५ मा ट्वीटरमा राखेकी थिइन् । उनले ‘इस्तानबुलमा विश्वकै चर्चित अभिनेता, निर्देशक, फिल्ममेकर आमिर खानसँग भेट भयो । मलाई यो कुरा थाहा पाएर खुशी लाग्यो कि आमिरले आफ्नो नयाँ फिल्म ‘लाल सिंह चड्डा’को सुटिङ टर्कीको अलग अलग स्थानमा गर्ने निर्णय लिएका रहेछन्’ भन्दै ट्वीट गरेकी थिइन् ।
एमीनसँगको आमिरको भेटघाटलाई भारतका केही व्यक्तिले रुचाएका छैनन् । बीजेपी नेता र दिल्ली दंगा भन्दा अघि आफ्नो भाषणका कारण चर्चामा रहेका कपिल मिश्रासहित वरिष्ठ वीजेपी नेता सुब्रमण्यम स्वामीले यो विषयमा लेखेका छन् । ‘उनलाई भारतमा डर लाग्छ’ आमिरप्रति व्यंग्य गर्दै कपिलले ट्वीट गरेका छन् । त्यस्तै सुब्रमण्यम स्वामीले ‘अर्थात म सही साबित भएको छु कि आमिर खान तीन खानमध्ये एक हो’ भन्दै ट्वीट गरेका छन् ।
पत्रकार अशोक श्रीवास्तवले ‘भारतका मित्र देश इजरायलका प्रधानमन्त्रीसँग भेट्ने कुरामा आमिर खानले आनाकानी गरेका थिए । तर भारतको शत्रु देश टर्कीका राष्ट्रपतिको पत्नीको आतिथ्यता स्वीकार गर्नुमा उनलाई कुनै हिचकिचाहट भएन’ भन्दै ट्वीट गरेका छन् । अभिनव खरेले ‘यो फिल्मको रिलिजको समयमा यो तस्बिर याद राख्नुहोला । हाम्रो पैसालाई हाम्रा विरुद्ध प्रयोग गर्न नदिनु’ भन्दै ट्वीटेका छन् ।
टर्कीसँग भारतीय रिसाउनुको कारण पनि छ । जम्मू कश्मीरबाट अनुच्छेद ३७० हटाएपछि टर्कीले यो कार्यको विरोध गरेको थियो । त्यो बेला टर्कीका राष्ट्रपतिले ‘हाम्रा कश्मीरी भाइबहिनीहरु दशकौंदेखि पीडित छन् । हामी एकपटक पुनः कश्मीरमा पाकिस्तानको साथमा छौं । हामीले यो मुद्दालाई संयुक्त राष्ट्र संघको साधारण सभामा उठाएका थियौं । कश्मीरको मुद्दा युद्धबाट सुल्झाउन सकिँदैन । यसलाई न्याय र निष्पक्षताका साथ सुल्झाउन सकिन्छ । यस किसिमको समाधान सबै सबैको हकमा छ । टर्की, न्याय, शान्ति र संवादको समर्थन गर्दछ’ भनेका थिए । त्यो बेला टर्कीको निर्णयको भारतमा विरोध भएको थियो ।
आमिरलाई भेटेकी एमीन जहिल्यै हिजाब लगाउछिन् । टर्कीमा हिजाब प्रतिबन्धित थियो । हिजाबका साथ युवतीहरु विश्वविद्यालय जान सक्दैन थिए । अर्दोआनकी पत्नी हिजाबकै कारण कुनै सार्वजनिक कार्यक्रममा जादैन थिइन् ।