सिन्धुली । सिन्धुलीमा पचास वेडको आइसोलेसन भवन बनाउने तयारी गरिएको छ । सिन्धुलीमा कोरोना संक्रमित बढेसँगै यसको व्यवस्थापन र उपचारका लागि भवन बनाउने निर्णय भएको हो ।
जिल्ला विपद व्यवस्थापन समिति सिन्धुलीको आइतबार सिन्धुलीमाढीमा बसेको बैठकले पचास वेडको आइसोलेसन बनाउने निर्णय गरेको हो । जसको लागि प्राविधिक स्टमेट गरि सामाजिक विकास मन्त्रालयमा पठाउने र प्रिफाफ भवन बनाउने भएको हो ।
एक महिना भित्र सम्पन्न हुने गरि निर्माण गर्ने तयारी गरिएको भवन कमलामाई नगरपालिका वडा नं। ६ स्थित भु तथा जलाधार कार्यालय पछाडी बनाउने समेत बैठकले निर्णय गरेको छ ।
उक्त भवन निर्माणका लागि नेपाल रेडक्रस सोसाईटीका सभापति अशोक श्रेष्ठको संयोजकत्वमा समिति समेत बनाउने निर्णय गरिएको छ ।
सिन्धुली अस्पताललाई सामाजिक विकास मन्त्रालय वाग्मति प्रदेशले सिन्धुली अस्पताललाई पचास वेडको आइसोलेसन निर्माण गर्न निर्देशन दिएसँगै विपद व्यवस्थापन समितिले भवन बनाउने निर्णय गरेको हो ।
बैठकले भवन बनाउनका लागि प्राविधिक स्टमेट गरि मन्त्रालयलाई लागत पेश गर्ने निर्णय समेत गरेको छ । सिन्धुली अस्पताल विकास समितिका अध्यक्ष प्रलाद पोखरेलका अनुसार मन्त्रालयले भने भवन बनाउन नभई अस्पतालका लागि आवश्यक साधन स्रोत र इक्युप्मेन्टको व्यवस्थापन मन्त्रालयले गर्ने गरि निर्देशन प्राप्त भएको बताए ।
पोखरेलका अनुसार मन्त्रालयले भवन बनाउन आर्थिक सहयोग नगरेमा जिल्लाका स्थानीय तहले रकमको व्यवस्थापन गर्ने सहमति भएको छ । उनका अनुसार करिब एक महिना भित्र अस्पताल तयार हुने गरि काम हुने छ ।
सिन्धुली अस्पतालमा हाल कोभिड १९ संक्रमितको उपचारका लागि १४ वेड छ भने शनिबारदेखि एपोलो अस्पतालमा २५ वेडको आईसोलेसन स्थापना गरि सञ्चालनमा ल्याईएको छ । जिल्लामा ३३ जना संक्रमितहरु फेला परेका छन । जिल्लामा समुदायमा कोरोना भाइरस संक्रमण देखिन थालेको छ ।
शव व्यवस्थापन चुरेमा
यस्तै बैठकले शव व्यवस्थापनका लागि चुरे क्षेत्रलाई छनौट गरेको छ । अध्ययन पछि बैठकले कमलामाई नगरपालिका वडा नं। ९ को चुरे र कार्की खोलाको बीचको जंगलमा शव व्यवस्थापनका लागि ठाउँ छनौट गरेको हो ।
कोभिड १९ बाट मृत्यु हुनेका लागि स्थान छनौटका लागि रेडक्रस, नेपाली सेना, कमलामाई नगरपालिकालाई शव व्यवस्थापनका लागि स्थान छनौट गर्न यस अघि नै अधिकार दिईएको थियो ।
यस्तै क्वारेन्टाईनमा लाग्ने खर्चको व्यवस्थापन सम्बन्धित स्थानीय तहले व्यहोर्नुपर्ने, विद्यालयमा रहेका क्वारेन्टाईनलाई सरकारको निर्देशन बमोजिम हटाई सम्बन्धित स्थानीय तहले अन्यत्रै व्यवस्थापन गर्नुपर्ने लगाएतका निर्णय समेत भएका छन । सहायक प्रमुख जिल्ला अधिकारी ऋद्धि प्रकाश सिटौलाको अध्यक्षतामा बसेको बैठकले कोभिड १९ संक्रमित विरामीको व्यवस्थापनका लागि सिन्धुली अस्पतालले डेडिकेटेड एम्बुलेन्सको व्यवस्था गर्नुपर्ने निर्णय समेत गरेको छ । राजधानी दैनिकबाट