भक्तपुर जिल्लाको मध्यपुर थिमि नगरपालिका वडा नम्बर ३ कौशलटारमा आंशिक रुपमा लकडाउन हुने भएको छ ।
शनिबार वडा कार्यालयले एक सूचना जारी गर्ने समय तोकेर अत्यावश्क बाहेकका सेवा वन्द गर्न सबैमा आग्रह गरेको हो ।
शनिबारबाटै लागू हुने सूचनामा उक्त वडाक्षेत्र भित्र रहेका अत्यावश्यक खाद्यान्न तथा किराना पसल, तरकारी तथा फलफुल पसल, दुध डेरी, पेट्रोल पम्प बिहान ५ बजेदेखि ९ बजेसम्म र बेलुका ५ बजेदेखि ७ बजेसम्म खुल्ला गर्ने निर्णय गरेको छ ।
अर्को सूचना जारी नभएसम्मको लागि माथि उल्लेखित बाहेक अन्य प्रकारका कुनै पनि पसल, होटल रेष्टुरेन्ट, हजाम, जिमखाना, जुम्बा, सवारी मर्मत केन्द्र, खाजा पसल, बैंक तथा वित्तिय संस्थाहरु पूर्ण रुपमा बन्द हुनेछन् ।
वडाले अति आवश्यक काम परे मात्र आफ्नो घरबाट मास्क लगाएर बाहिर निस्कन अन्यथा घरमै सुरक्षित रुपमा बस्न पनि वडाबासीहरुमा आग्रह गरेको छ ।
अपडेट : मध्यपुर थिमि नगर भदौ ९ सम्म लकडाउनः अस्पताल सिल
मध्यपुरथिमि नगरपालिका क्षेत्रभित्र समुदायस्तरमा कोरोना सङ्क्रमण फैलिएपछि लकडाउन गरिएको छ । नगरपालिकाका प्रमुख मदनसुन्दर श्रेष्ठको नेतृत्वमा उपप्रमुख अञ्जनादेवी मधिकर्मी, सबै वडाका वडाध्यक्ष, कार्यपालिका सदस्यसहितकोे आज साँझ बसेको आकस्मिक बैठकले मध्यपुर थिमि नगर क्षेत्र आगामी भदौ ९ गतेसम्मका लागि बन्दाबन्दी गर्ने निर्णय गरेको हो ।
नगरपालिका क्षेत्रभित्र हालसम्म ४१ जनामा कोरोना भाइरस सङ्क्रमण भएपछि नगरपालिकाले लकडाउनको निर्णय गरेको छ । बैठकपछि नगर प्रमुख मदनसुन्दर श्रेष्ठले समुदायस्तरमै कोरोना फैलिएको अवस्था देखेर भदौ ९ गतेसम्म नगरपालिका क्षेत्र लकडाउन गर्ने निर्णय गरिएको जानकारी दिए ।
नगरपालिकाले अत्यावश्यक खाद्य पदार्थ, पानी, ग्यास र औषधि पसल बिहान ११ बजेदेखि १ बजेसम्म दुई घण्टा मात्रै खोल्न पाइने तथा अन्य व्यवसाय सञ्चालन गर्न नपाइने निर्णय गरेकोे छ । लकडाउन अवधिभर नगरपालिका क्षेत्रमा पर्ने अरनिको राजमार्गको पूर्वतर्फ हनुमन्ते नदी तथा राधेराधेदेखि पश्चिमतर्फ जडिबुटी मनोहरा पुलसम्म कुनै सवारी साधनले मान्छे चढाउन र ओराल्न नपाउने निर्णय भएको छ ।
नगरपालिकाले सङ्घीय सरकारलाई अरनिको राजमार्गमा यातायातका साधन सञ्चालनमा रोक लगाउन पनि माग गरेको छ । तत्कालका लागि अरनिको राजमार्गमा कुनै सवारी साधन रोक्न, यात्रु चढाउन र ओराल्न नपाइने गरी लकडाउनको निर्णय गरिएको नगर प्रमुख श्रेष्ठले बताउनुभयो । नगरपालिका क्षेत्रभित्र कुनै पनि सडकमा अत्यावश्यक सवारी साधनबाहेकका सवारी साधन सञ्चालनमा पूर्ण रुपमा रोक लगाइएको छ ।
त्यसैगरी नगरपालिकाद्वारा सञ्चालित नेपाल कोरिया मैत्री नगरपालिका अस्पताल आज सिल गरिएको छ । अस्पतालमा कार्यरत तीन नर्स र एक सहयोगी गरी चार जनामा कोरोना सङ्क्रमण पुष्टि भएपछि अस्पताल बन्द गरिएको नगर प्रमुख श्रेष्ठले जानकारी दिनुभयो ।
अस्पतालमा कोरोना सङ्क्रमित भेटिएपछि आकस्मिक कक्षबाहेकका सम्पूर्ण सेवा बन्द गरिएको हो ।
सङ्क्रमित नर्स तथा कर्मचारीलाई अस्पतालकै आइसोलेसनमा राखेर उपचार गरिएको र कर्मचारीलाई क्वारेन्टाइनमा राखिएको उहाँले जानकारी दिनुभयो । आजसम्म भक्तपुरमा १२४ कोरोना सङ्क्रमित भइसकेका छन् ।
नोट : मध्यपुर थिमि नगरले गरेको निर्णय र वडा नम्बर ३ (कौशलटार) मा भएका निर्णय फरक फरक हुन् ।
