नेपाल कम्युनिष्ट पार्टी (नेकपा) को विवाद समाधानका लागि महासचिव विष्णु पौडेलको संयोजकत्वमा ६ सदस्यीय कार्यदल गठन गरिएको छ ।
आज (शुक्रबार) बालुवाटारमा नेकपा अध्यक्ष केपी शर्मा ओली र अर्का अध्यक्ष पुष्पकमल दाहालबीच भएको छलफलमा सो कार्यदल बनाउने निर्णय भएको हो । कार्यदलमा महासचिव पौडेलसहित स्थायी समिति सदस्यहरू शंकर पोखरेल, भीम रावल, सुरेन्द्र पाण्डे, जनादर्न शर्मा र पम्फा भुसाल रहेका छन् ।
६ सदस्यीय साे कार्यदलले शनिबारदेखि नै काम सुरु गर्ने भएको छ।
कार्यदलका संयोजक पौडेलले भोलिदेखि नै आफूहरुले काम सुरु गर्ने र विवाद समाधानको विषयमा छिट्टै नै प्रस्तावको मस्यौदा अध्यक्षद्वयलाई बुझाउने बताए।
अध्यक्षद्वयबीच सहमति हुन नसक्दा स्थायी कमिटी बैठक समेत रोकिएको अवस्था छ । दुवै अध्यक्षबीच पटक-पटक वार्ता हुँदा समेत निकास निस्किन नसकेको अवस्थामा कार्यदलले विवाद समाधान गर्न सक्ने अपेक्षा गरिएको छ । कार्यदललाई चाँडोभन्दा चाँडो सहमतिको खाका तयार पार्न निर्देशन समेत दिइएको छ ।
गत साउन १८, १९ र २० गते दुई अध्यक्षबीच संवाद भए तापनि निचोडमा पुग्न सकेको थिएन। २१ गते अध्यक्ष दाहालसहित उनी पक्षीय सचिवालय सदस्यहरूले पत्रकार भेटघाटमा जतिसुकै खराब परिणाम पनि आउन सक्ने बताएका थिए। त्यसपछि सोही साँझका लागि तय भएको अध्यक्षहरूको छलफल रोकिएको थियो।
अध्यक्षहरूका बीचमा लगातार छलफल हुने तर त्यसले कुनै निचोड निकाल्न नसक्ने हुँदा कार्यकर्ता झन् निराश हुने भएकाले यसरी ‘तारेख’ धाएझैं दिनदिनै निष्कर्षविहीन छलफल गर्नभन्दा केही समय रोकिएर सहमतिको विकल्पसहित संवाद थाल्नुपर्ने भन्दै दोस्रो तहका नेताहरू सक्रिय भएका थिए।
नेकपामा असार १० गते बसेको स्थायी समिति बैठकमा अधिकांश सदस्यहरुले ओलीले अध्यक्ष र प्रधानमन्त्री दुवै पदबाट राजीनामा दिनुपर्ने धारणा राखेपछि विवाद उत्कर्षमा पुगेको हो ।
