सिन्धुपाल्चोकको जुगल गाउँपालिका २ लिदिमा आज बिहान गएको पहिरोमा परेर बेपत्ता भएकाहरुको परिचय खुलेको छ । पहिरोमा परेकाहरुमध्ये थप ३९ जनाको उद्धार पनि गरिएको छ ।
बेपत्ता हुनेहरुमा विक्रम दोङ, भीमदास दोङ, डेमाछिरिङ दोङ, रुपलाल दोङ, प्रकाश, अमृत, जयबहादुर दोङ, रेशमबहादुर दोङ, इन्द्र दोङ, डोल्मा छिरिङ, जुनबहादुर दोङ, बाङची लामा, युवराज दोङ, साङवा दोङ र दावा आल्बो दोङ रहेका छन् ।
यस्तै, रामकुमार दोङ, इमान दोङ, जम्पाद दोङ, जीताई लामा, इसुरे दोङ, हिरा भक्ति, अम्वा दोङ, दौलत लामा, साङवा दोङ, दोर्जे दोङ, बलबहादुर दोङ, सानु दोङ, ब्यावरानी दोङ, कान्छा दोङ, सोमपाल दोङ, निसमाई दोङ, जुनलाल दोङ, टिकमाई दोङ र छिरिङ दोङ लगायत बेपत्ता भएका छन् ।
उक्त पहिरोमा गम्भीर घाइते भएका पाँच जनालाई अस्पताल लगिएको छ । सेनाको टोलीले हेलिकप्टरबाट उनीहरूको उद्धार गरेको हो ।
घाइतेहरूलाई चौतारास्थित जिल्ला अस्पताल ल्याएर उपचार गर्न थालिएको जिल्ला प्रहरी कार्यालयका प्रहरी नायब उपरीक्षक माधवप्रसाद काफ्लेले बताए । जिल्ला समन्वय समितिको अगुवाइमा उद्धारका लागि हेलिकप्टर पठाइएको उनले जानकारी दिए ।
प्रतिनिधिसभाका सभामुख अग्निप्रसाद सापकोटा लिदीमा
प्रतिनिधिसभाका सभामुख अग्निप्रसाद सापकोटा पहिरो गएर २२ वटा घर पुरिएको सिन्धुपाल्चोकको जुगल गाउँपालिका पुगेका छन् ।
नेपाली सेनाको हेलिकोप्टरमार्फत सापकोटा त्यहाँ पुगेका हुन् ।
सापकोटाका प्रेस सल्लाहकार श्रीधर न्यौपानेका अनुसार आज विहान ६ बजे गएको पहिरोमा ठूलो मात्रामा मानविय क्षती भएपछि सभामुख त्यसतर्फ उद्धारको लागि पुगेको जानकारी दिए। ‘लिदी पहिरो उद्धार लागि काठमाडौंबाट हेलिकोप्टरमा आएर सभामुख चौतारामा झर्नुभएको थियो। उद्धारका लागि पहिलो प्राथमिकता भएकाले घाइतेको उद्वार गर्न हेलिकप्टरमा सेना पठाइएको हो, त्यसपछि उहाँ घटनास्थल पुग्नु भएकाे हाे।’ न्यौपानेले भने।