समुदायमा एकपछि अर्कोमा कोरोना संक्रमण पुष्टि भएपछि मेचीनगर नगरपालिका क्षेत्र भोलिदेखि (विहीवार) लकडाउन गरिदैछ ।
समुदायका थप ४ जनामा कोरोना भाइरसको संक्रमण पुष्टि भएपछि नगरपालिकाले भोलिदेखि ७ दिनलाई लकडाउन गर्ने भएको कोरोना नियन्त्रण कार्यदलका संयोजक नविन बरालले जानकारी दिए ।
लकडाउन गर्ने विषयमा अहिले मेचीनगर नगरपालिकामा बैठक बसिरहेको छ । निणर्य गरेर लकडाउनको मोडालिटी तयार गरेर सार्वजनिक गरिने उनले जानकारी दिए ।
एक डाक्टरसहित समुदायका ४ जना व्यक्तिमा कोरोना भाइरसको संक्रमण पुष्टि भएपछि नगरपालिकाले त्यस्तो निणर्य गर्न लागेको हो ।
मेचीनगर १० का एक युवामा पहिलो पटक पुष्टि भएपछि समुदायमा कोरोना फैलिएको हो । कोरोना पुष्टि भएका डाक्टर मेची आम्दा अस्पतालको भएको बताइएको छ । उनी मेचीनगर १० मा बस्दै आएका छन् ।
आज संक्रमण पुष्टि हुनेमा डाक्टर २९ वर्षका छन् भने अर्का संक्रमित मेचीनगर-७ इटाभट्टाका २८ वर्षका पुरुष नै छन् । त्यस्तै, अरु दुईजना संक्रमित मेचीनगर-१० की २५ वर्षीया महिला र १३ वर्षका बालक छन् । यी दुबै मेचीनगरमा पहिलोपटक समुदायमा संक्रमण देखिएका १५ वर्षीय फुटबल खेलाडीका दिदी र भाइ हुन् ।
साउन २४ गते धुलाबारीमा समुदायस्तरका १०२ जना व्यक्तिको स्वाव परीक्षण गरिएको थियो । त्यही नमुनाबाट ४ जनामा कोरोना पुष्टि भएको हो । मेचीनगरमा हालसम्म कोरोना संक्रमितको संख्या एकसय पुगेको छ ।
