विर्तामाेड । फुटबल खेल्दा बलले छातीमा लागेर घाइते भएका झापाको कनकाई नगरपालिका–५ का १७ बर्षिय रोशन सुनारको झापाका अस्पतालले उपचार गर्न नमान्दा मृत्यु भएको छ । केहीदिन अघि साथीहरुसँग फुटबल खेल्ने क्रममा सुनारको छातीमा बलले लागेको थियो ।
छातीमा बलले लागेपछि घरमै आराम गरिरहेका उनको स्वास्थ्य अवस्था बिग्रिँदै गयो । उनी झापाको विर्तामोडमा रहेको बिएण्डसी अस्पतालमा उपचारका लागि आए । त्यो बेला उनको श्वासप्रश्वासमा समस्या भइरहेको थियो । कोरोना भाइरसको संक्रमणको शंका गरेर बिएण्डसी अस्पतालले पिसिआर रिपोर्ट माग्यो र उपलब्ध नगराए उपचार गर्न नसकिने उक्त अस्पतालले जानकारी दियो ।
त्यहाँ उपचार गराउन संभव नभएपछि विर्तामोडकै कनकाई अस्पताल उपचारका लागि गए । त्यहाँ पनि पिसिआर रिपोर्ट मागे । कनकाई अस्पतालमा पनि सुनारको उपचार संभव भएन ।
मंगलबार बिहानको राति करिब २ बजेतिर उनलाई लिएर उनका अभिभावक मेची अस्पताल भद्रपुर पुगे । मेची अस्पताल भद्रपुरले भर्ना गरेर उपचार शुरु गरेको थियो । तर केही क्षणपश्चात शरीरमा अक्सिजनको मात्रा कम हुँदै गएपछि उनलाई भेन्टिलेटरसहितको सघन उपचार चाहियो ।
मेची अस्पतालमा उक्त सुविधा नभएपछि भेन्टिलेटरका लागि भद्रपुरकै ओम साई पाथिभरा अस्पताल सुनारलाई रेफर गरियो । त्यहाँ पनि पिसिआर कै रिपोर्ट मागेपछि उनलाई लिएर उनका अभिभावक फेरि मेची अस्पताल नै पुगे । त्यहाँ इमरजेन्सी कक्षमा उनको मृत्यु भएको मेची अस्पतालका चिकित्सक डा. गोविन्द कँडेलले जानकारी दिए ।.
बिएण्डसी हस्पिटलका जनसम्पर्क अधिकृत प्रमिश गिरीले ज्वरो आएका बालकको उपचार गरिएको तर कोरोनासँग मिल्दोजुल्दा लक्षण देखिएपछि कोभिडको परीक्षण हुने र उपचार हुने अस्पतालमा लैजान सिफारिस गरिएको बताए । कोभिडको उपचार र पीसीआर परीक्षण बिएण्डसी हस्पिटलमा नहुने हुँदा शंकास्पद बिरामीलाई अन्यत्र पठाउनु बाध्यता भएको उनको भनाइ थियो ।
झापामा मेची अञ्चल अस्पतालमा मात्र कोभिड –१९ को पीसीआर परीक्षण र उपचार हुने गरेको छ । २५ शय्याको आइसोलेशन वार्ड भने संक्रमितले भरिएका छन् ।
मृतक सुनारमा कोरोना भाइरसको संक्रमण छ/छैन भनेर परीक्षण गर्नका लागि स्वाब संकलन गरिएको थियो । कोरोना लागेको आशंकाका कारण झापाका निजी अस्पतालले भर्ना लिन नमानेका सुनारको रिपोर्ट ज्यान गुमाइसकेपछि नेगेटिभ आएको छ । नीजि अस्पतालहरुले समयमा नै उनको उपचार गरेको भए ती १७ वर्षिया युवकले अकालमा ज्यान गुमाउनु पर्ने थिएन ।
झापाका नीजि अस्पतालले भर्ना लिन नमानेको यो पहिलो केस भने होइन् केही महिनाअघि झापाको कन्काइ नगरपालिका १ का चित्रबहादुर दर्जीको केस पनि यस्तै थियो ।
२५ फागुनमा छिमेकीको घरमा लड्दा कन्काई नगरपालिका–१ का चित्रबहादुर दर्जी (४०) चार दिनअघि अचेत भए । परिवारजनले नजिकैको क्लिनिक लगे । उसले मेची अस्पताल पठायो । तर, मेची अस्पतालले ढोकै खोलेन । अत्तालिएका आफन्त अचेत दर्जीलाई बोकेर भद्रपुरमा रहेको ओम साई पाथीभरा अस्पताल पुगे । यसले पनि भर्ना लिएन । त्यसपछि उनीहरू बी एन्ड सी अस्पताल पुगे । त्यहाँ गेटबाट भित्र छिर्नै दिइएन ।कोरोनाको त्रास भन्दै यसरी अस्पतालले विरामी हेर्न छाडेपछि सर्वसाधारण उपचार पाउनबाट वञ्चित भएका छन् । ‘मेची अस्पताल पु-याउँदा यहाँ हुँदैन भन्दै झ्याप्पै ढोका थुनिदिए । त्यसपछि ओम साई पाथीभरा अस्पताल भद्रपुर लग्यौँ । त्यहाँ पनि मानेनन् । बी एन्ड सीले त झन् गेटभित्रसमेत पस्न दिएन । कराउँदै बाहिर निकाल्दिए,’ दर्जीकी श्रीमती देवीले रुँदै भनिन्, ‘अब कहाँ लैजाऊँ ?’
र यो पनि पढ्नुहोस् :
ढोका थुनेर बसेका छन् अर्बपतिका हस्पिटलहरु
यो घटनाबाट मेची अञ्चल अस्पतालमा भेन्टिलेटरको सुविधाको आवश्यकता परेको छ । शहरैपिच्छे खुलेका नीजि अस्पतालहरुले सेवाको नाममा सर्वसाधारणबाट ठूलो रकम असुलिरहेका समाचार यसअगाडी पनि प्रकाशित भएका थिए । मान्छे नीजि अस्पतालमा गएर उपचार गराउँदा आफ्नो घरखेत नै बेच्नुपर्ने अवस्था आएको धेरै उदाहरणहरु हाम्रो समाजमा देख्न र सुन्न पाइन्छ ।
झापामा रहेका पत्रकार प्रेम आचार्यको सहयोगमा तयार पारिएको ।
नोट : यसअगाडी झापाको बिएण्डसी अस्पताल हुनुपर्नेमा बिर्तासिटी अस्पताल हुन गएकोमा सच्चाइएको छ ।
