मुम्बई(एजेन्सी) । बलिउड फिल्मको इतिहासमा हालसम्म कैयौं सानदार फिल्म बनिसकेका छन् र आगामी दिनमा बन्ने तयारीमा पनि छन् ।
केही फिल्महरु दर्शकका लागि दीर्घकालिन सम्झनाका रुपमा छन् । भारतमा फिल्मका फ्यानको माया केवल फिल्म हेरुन्जेल मात्र छैन । उनीहरुको लगाव फिल्ममा प्रयोग गरिएका सामाग्रीमा पनि उत्तिकै छ । फिल्मका कलाकारले लगाएको पहिरनदेखि उनीहरुले प्रयोग गरेका सामानसम्म लिलामीमा किन्न फ्यानहरु लालयित हुन्छन् ।
कतिपयले त लिलाम बढाबढमा ती सामानहरु किनेका नै छन् ।
निर्देशक आशुतोष गोवारिकरको फिल्म ‘लगान’ सन् २००१ मा रिलिज भएको थियो । यो ब्लकब्लष्टर फिल्म क्रिकेट खेल वरपर घुमेको थियो ।
फिल्ममा आमिर खानले जुन ब्याटले क्रिकेट खेले, त्यो ब्याटमा आमिरसँगै फिल्मका बाँकी सदस्यले पनि हस्ताक्षर गरेका थिए । जुन ब्याटलाई लिलामीमा राख्दा १ लाख ५६ हजारमा बिक्री भएको थियो ।
फिल्म ‘मुझसे शादी करोगी’को सुपरहिट गीत ‘जीने के है चार दिन’ सबैले सम्झिएकै गीत हो । यो गीतको छायांकनका क्रममा अभिनेता सलमान खानले तौलियाको प्रयोग गरेका थिए ।
त्यो तौलियालाई अनलाइन लिलाम गर्दा १ लाख ४२ हजारमा बिक्री भएको थियो ।
बलिउड सुपरस्टार देव आनन्दले कैयौं दशकसम्म दर्शकलाई आफ्नो फिल्ममार्फत मनोरन्जन दिइरहे । यी सदाबहार अभिनेताको ४५ श्यामस्वेत तस्बिर ४ लाख रुपैंयाँमा विक्री भएको थियो ।
अभिनेत्री प्रियंका चोपडाको ‘क्रिश्चियन लुबोटिन शूज’को लिलामी गरिएको थियो । यो जुत्ता २ लाख ४५ हजारमा बिक्री भएको थियो ।
लिलामीबाट आएको पैसा प्रियंकाले ‘सेभ द गर्ल’ नामक संस्थालाई दान दिएकी थिइन् ।
अभिनेता शम्मी कपूरले आफ्नो सुपरहिट फिल्म ‘जंगली’ जुन ज्याकेट लगाएका थिए । त्यो ज्याकेट ८८ हजार रुपैयाँमा बिक्री भएको थियो ।
यो ज्याकेट बलिउड अभिनेता आमिर खानले किनेका थिए ।
