वीरगंज स्थित नारायणी अस्पतालको अस्थायी कोभिड गण्डक अस्पतालमा आज विहान निधन भएका पुरुषमा कोरोना पुष्टी भएको छ । अस्पतालमा उपचाररत ६५ वर्षीय भारतीय नागरिकको मृत्युपछि कोरोना भाइरसको संक्रमण पुष्टि भएको छ।
नारायणी अस्पतालको प्रयोगशालाम गरिएको पिसिआर परीक्षणमा उनमा कोरोना पोजेटिभ देखिएको अस्पताल स्रोतले बताएको छ । वीरगंजको आदर्शनगर निवासी ६५ वर्षीय श्याम सुन्दर बगरीयालाई श्वास प्रश्वास सम्बन्धि समस्या भएपछि हिजो साँझ उपचारको लागि नारायणी अस्पताल लगिएको थियो।
बगरीया मुटु रोगी समेत रहेको र अस्पतालमा कोरोना संक्रमणको आशंकामा तत्काल आरडिटी टेष्ट गराउँदा रिपोर्ट पोजेटिभ आएपछि थप उपचारकालागि नारायणी अस्पतालको अस्थायी कोभिड गण्डक अस्पतालमा भर्ना गरिएको थियो। अस्पतालको भेन्टिलेटरमा उपचारको क्रममा उनको आज बिहान साढे ६ बजे मृत्यु भएको अस्थायी कोभिड गण्डक अस्पतालका प्रमुख डाक्टर निरज सिंहले जानकारी दिएका छन् ।
अहिले उनको शव अस्पतालमै राखिएको छ। आज राति भएकाले मृतकको शव भोलि सेनाको टोलीले व्यवस्थापन गर्ने अस्पतालले जनाएको छ। योसँगै नेपालमा कोरोनाको कारण ज्यान गुमाउनेको संख्या ४६ पुगेको छ ।
नेपालमा कोरोनाबाट विदेशी नागरिको मृत्यु भएको यो दोस्रो घटना हो। यसअघि टिचिङ अस्पतालमा एकजना कोरोना संक्रमित चिनियाँ महिलाको मृत्यु भएको थियो। उनी पोखरामा व्यापार गर्दै आएकी थिइन्।
यसअघि वीरगंजमा भारत माइती भई वीरगञ्ज– २१ बस्ने १७ वर्षीया युवतीको शुक्रबार साँझ मृत्यु भएको थियो भने शुक्रबार बिहान वीरगञ्जकै कोभिड अस्पतालको आइसोलेसनमा वीरगञ्ज ११ श्रीपुरकी ८५ वर्षीया महिलाको मृत्यु भएको थियो।
त्यसैगरी गत मङ्गलबार आइसोलेसनमै ज्यान गुमाएका माइस्थानका ७० वर्षीय बृद्धमा बिहीवार कोरोना संक्रमण पुष्टि भएको थियो। संक्रमितसँगै मृतकको संख्या बढ्न थालेपछि जिल्ला संकट व्यवस्थापन केन्द्रले संक्रामक रोग ऐन, २०२० अनुसार अर्को आदेश नभएसम्मका लागि वीरगंज महानगर क्षेत्र भित्र शनिबारदेखि अनिश्चितकालिन निषेधाज्ञा जारी गरेको छ।
र यो पनि पढ्नुहोस् :
उपचारको क्रममा अस्पताल लैजाँदै गर्दा बाटोमै ज्यान गुमाएका धनुषाका युवकमा पनि कोरोना पुष्टी
