आफूहरुलाई डिभी परेको र बिहे गरेर अमेरिका लैजाने आश्वासन दिई ठगी गर्ने दुई युवतीलाई प्रहरीले पक्राउ गरेको छ।
महानगरीय अपराध महाशाखाको टोलीले शुक्रबार बाग्लुङ काठे गाउँपालिका–२ घर भइ भक्तपुर बस्ने २७ वर्षीया कोपिला शर्मा र १९ वर्षीया अमिसा केसीलाई पक्राउ गरेको हो।
उनीहरूले विभिन्न व्यक्तिहरूलाई फेसबुक, टिकटक मार्फत फलो गर्ने र बिहे गरेर अमेरिकाको क्यालिफोर्निया लैजान्छु भन्दै करिब ६ लाख ६० हजार ठगी गरेको महाशाखाले जनाएको छ।
ठगी गरेर उनीहरू रूपन्देहीको बुटवल एरियामा लुकिछिपी बसेका थिए। थप कारबाहीको लागि महाशाखाले महानगरीय प्रहरी वृत्त, ठिमीमा पठाएको छ।
आम नेपालीको अमेरिका भनेको सपनाको देश हो । त्यहाँ जानको लागि मानिसहरुले ४० देखि ५० लाखसम्म खर्च गर्ने गरेको पाइन्छ ।
मानव तस्करी गर्दै विभिन्न देशको जंगलको बाटो हुँदै अन्त्यमा मेक्सीकोको पर्खाल नाघेर मानिसहरु अमेरिका छिर्ने गर्दछन् नेपाल मात्र हैन विश्वका अन्य विकासन्मुख देशहरुबाट पनि ठूलो संख्यामा अवैधानिक रुपमै भएपनि मानिसहरु अमेरिका छिर्ने गरेका छन् ।
