रौतहट, ११ साउन । रौतहटको राजदेवी नगरपालिकाका एक जना वडाध्यक्षमा कोरोना भाइरस संक्रमण फेला परेको छ । काम विशेषले काठमाडौं जानका लागि पीसीआर परीक्षण गराउँदा राजदेवी नगरपालिका–८ का अध्यक्षमा संक्रमण पुष्टि भएको हो ।
शनिबार करेन्ट लागेर उनको श्रीमतीको मृत्यु भएको थियो । अन्तिम संस्कारमा सयभन्दा बढी व्यक्तिहरु वडा अध्यक्षसँगै गएका थिए । उनले करेन्ट लागेर सख्त भएकी श्रीमतीलाई जिल्ला अस्पताल गौरमा समेत आफै उपस्थित भएर उपचार गराएका थिए ।
वडाध्यक्षको प्रत्यक्ष सम्पर्कमा रहेका व्यक्तिलाई क्वारेन्टाइनमा बस्न आग्रह गरेको राजदेवी नगरपालिकाका मेयर धिरेन्द्र सिंहले जानकारी दिएका छन् । वडा अध्यक्षमा अन्य रोग समेत रहेकाले उपचारका लागि काठमाडौं पठाइने जनाइएको छ ।
संक्रमितसँग सम्पर्क भएका केही जनप्रतिनिधि तथा स्थानीय व्यक्ति आ–आफ्नै घर क्वारेन्टाइनमा बसेका छन् । संक्रमित व्यक्तिसँग सम्पर्कमा रहेकाहरुको पहिचान गरी स्वाब संकलनको काम शुरु भएको रौतहटका सिडिओ वासुदेव घिमिरेले जानकारी दिएका छन् ।