काठमाडौं – नेपाली गीत संगीतको स्तरीयतालाई लिएर बेलाबेलामा बहस हुने गर्छ । पछिल्लो समय कभर गीत गाउने गायक–गायिकाहरुको जमात बढिरहेको छ ।
चर्चित भनिएका गायक/गायिकाहरुले पनि विना कुनै तयारी गीत गाइरहेका हुन्छन् । कुनै अन्तर्वार्तामा गीत गाउन लगाइयो भने उनीहरु ट्रोलको शिकार हुन्छन् ।
भर्खरै मात्र ऋषि धमलाको शो मा गएर भाइरल भएका दुर्गेश थापा को चौतर्फी बिरोध भइरहेको छ ।
यसै सन्दर्भमा नेपालकी चर्चित गायिका आस्था राउतले पनि मुख खोलेकी छिन् ।
उनले फेसबुकमा स्टाटस लेख्दै ‘अटो ट्युनले जो पनि गायक भएको’ बताएकी छिन् । उनी भन्छिन् – ‘नाच्ने मान्छे रहरले गाउन थाल्छ, न सुर सिकेर आउँछ न ताल आउँछ, अटो ट्युनले आजकाल जो पनि गाउने ।’
‘के भाको हे दैव गीतहरु सुन्नै नसक्ने ?,’ आस्था प्रश्न गर्छिन् ।
नाच्ने मान्छे रहरले गाउन थाल्छ,
न सुर सिकेर आउँछ न ताल आउँछ,
Auto-tuneले आजकल जो पनि गाउने,
के भाको हे दैव गीतहरु…Posted by Aastha Raut on Thursday, July 23, 2020
आस्थाले नेपाली संगीतको भविष्य कस्तो रहला भन्नेमा चासो व्यक्त गरेकी छिन् । ‘युट्युबबाट डलर त आउला तर म्युजिकल ज्ञान कहाँबाट आउला ?,’ उनी भन्छिन् ।
पछिल्लो समय युट्युबबाट पैसा आउने कारण धेरैले आफ्नै च्यानलबाट गीत सार्वजनिक गर्ने गर्छन् । कतिपय कलाकारले त प्रयोगकर्ताको ध्यान तान्न विवादित गीत गाउने, त्यस्तै शब्दको प्रयोग गर्ने समेत गर्छन् ।
‘हेर्दैछु नेपाली गीत संगीत कहाँ जाँदैछ, के दर्शकलाई यस्तै चटक मन पर्दैछ?,’ आस्था गुनासो गर्छिन्, ‘हैट, अब चाहिँ के गर्नु ? केही बोल्नु कि नबोल्नु ?’
उनको यो स्टाटसमा कमेन्ट गर्नेहरुको लर्को नै लाग्ने गरेको छ । सबैले आस्थाको कुरालाई सही भनेर उनको समर्थन गरिरहेका छन् ।