पूर्व प्रधानमन्त्री डा.बाबुराम भट्टराईले संसद् अधिवेशन बोलाएर प्रधानमन्त्रीबाट केपी शर्मा ओलीलाई बिदा गर्नु पर्ने बताएका छन् ।शुक्रबार ट्वीट गर्दै भट्टराईले प्रधानमन्त्री केपी ओलीलाई बिदा गरेर नेकपा भित्रैबाट अर्को व्यक्ति चयन गर्न भनेका हुन्।
साथै उनले अपराधलाई संरक्षण गर्ने न्यायाधीशमाथि महाअभियोग लगाउन प्रस्ताव गरेका छन् ।देश गम्भीर संकटतिर जान लागेको बताउँदै भट्टराईले धारणा बुँदागत रूपमा ट्वीटरमार्फत् सार्वजनिक गरेका छन् ।
‘अपराधका संरक्षक न्यायाधीशमाथि महाभियोग लगाऊँ’ भट्टराईले ट्वीट गरेका छन् ‘केपी ओलीलाई बिदा गरेर नेकपाभित्रबाटै नयाँ प्रधानमन्त्री चयन गरौँ।’
त्यस्तै भट्टराईले संसद् अधिवेशन बोलाउनुपर्ने पनि जोड दिएका छन्। उनले प्रत्यक्ष निर्वाचित कार्यकारी राष्ट्रपतिमा जानुपर्ने उल्लेख गरेका छन्।
यस्ता छन् डा.बाबुराम भट्टराईका धारणा बुँदागत रुपमा :
– संसद अधिवेशन बोलाउँ
– केपी ओलीलाई विदा गरेर नेकपाभित्रैबाट नयाँ प्रधानमन्त्री चयन गरौं
– अपराधका संरक्षक न्यायाधीशमाथि महाभियोग लगाउँ
– भ्रष्टाचार रोक्न शक्तिशाली लोकपाल गठन गरौं
– प्रत्यक्ष निर्वाचित कार्यकारी राष्ट्रपतिमा जाउँ
हिजो बाबुराम भट्टराईले ट्विटर मार्फत राज्य असफल भएको बताएका थिए । एक ट्विट गर्दै भट्टराईले लेखेका थिए “पत्नीको ह-त्या गर्ने डिआइजी अदालतबाट सजाय कटौती गराएर विजयी राजनेता झैं हात हल्लाउँदै निस्कन्छ ! जाँड खाएर गाडी चलाउँदा सडकपेटीमा मान्छे मार्ने धनाढ्यको छोरो अदालतबाट धरौटीमा रिहा हुन्छ! सांसद अप-हरण गर्ने पूर्व आइजीपी विरूद्ध सरकारले मुद्दै चलाउँदैन ! यो असफल राज्यको लक्षण नभए के हो?”