काठमाडौं । बुढानिलकण्ठ स्कुलले विद्यालय सञ्चालन नभएको अवस्थाको शुल्क नलिने भएको छ ।
विद्यालयका प्रिन्सिपल होमनाथ आचार्यले बन्दाबन्दी (लकडाउन) का बीच मासिक शुल्क बुझाइसकेको भए पनि पछि शुल्कमा मिलान गरिने बताए ।
उनले विद्यार्थीको मासिक शुल्क पेश्की स्वरुप बुझाउनका लागि पठाइएको बिल अर्को निर्णय नहुँदासम्मका लागि स्थगित गरिएको समेत जानकारी दिए ।
विद्यालयले लकडाउन समयमा चैतदेखि असारसम्मको मासिक शुल्क भन्दै अभिभावकलाई बिल पठाएको थियो ।
शिक्षा मन्त्रालयले निजी विद्यालयलाई चैत महिनाको शुल्क नलिन, वैशाखयता भर्ना नगर्न तथा विद्यार्थीसँग शुल्क नलिन पटक–पटक निर्देशन दिँदै आएको थियो ।
तर, सरकारकै निर्णयविरुद्ध हुने गरी बुढानीलकण्ठ स्कुलले विद्यार्थीले खाँदै नखाएको खानासहित तीन महिनाको शुल्क मागेको थियो ।
बुढानीलकण्ठ स्कुल व्यवस्थापन समितिको अध्यक्ष शिक्षा मन्त्रालयका सहसचिव रहने व्यवस्था छ ।
शिक्षा मन्त्रालयले विद्यालय सञ्चालनका लागि वार्षिक करिब पाँच करोड अनुदान दिने गरेको छ ।
निजी विद्यालयलाई कुनै पनि शुल्क नलिन निर्देशन दिएपछि विद्यालयका शिक्षक कर्मचारीले लामो समयदेखि तलबभत्ता पाएका छैनन् ।
बुढानीलकण्ठ स्कुलले औसत मासिक शुल्क १८ हजार रुपैयाँ लिँदै आएको छ । स्कुलमा करिब ११ सय विद्यार्थी अध्ययनरत छन् ।
