पोखरा महानगरपालिका वडा ९, नयाँबजारमा शनिबार दिउँसो दुई वटा मोटरसाइकल आपसमा ठोकिँदा आगलागी भएको छ ।
आगलागीले दुवै मोटरसाइकल जलेर नष्ट भएका छन् ।
ग १४ प ३८६१ र ग १६ प ४४४१ नम्बरको मोटरसाइकल दिउँसो ३ बजेर २५ मिनेटमा नयाँबजारस्थित बृहस्पति पेट्रोल पम्प नजिकै आपसमा ठोक्किएका थिए ।
मोटरसाइकल ठोक्किए लगत्तै एक्कासी आगो लागेको र जलेर नष्ट भएको जिल्ला प्रहरी कार्यालय कास्कीका प्रवक्ता प्रहरी नायव उपरीक्षक सुवाश हमालले जानकारी दिए ।
मोटरसाइकलमा एक्कासी आगो लागेपछि स्थानीयले पानीले निभाउने प्रयास गरे पनि सो व्यर्थ भएको थियो । लगत्तै पोखरा महानगरको दमकलले मोटरसाइकलमा लागेको आगो निभाएको थियो।
हमालका अनुसार दुवै मोटरसाइकल २–२ जना सवार थिए । उनीहरुको हातमा सामान्य चोटपटक लागेको र उपचारार्थ गण्डकी मेडिकल कलेजमा लगिएको छ ।
तस्विरहरु
यसमा प्रयोग गरिएका तस्विरहरु पोखराबाट सञ्चालन हुने इआदर्शन डटकमबाट लिइएका हुन् ।