निर्वाचन आयोगमा दल दर्ताका लागि निवेदन दिएको नेकपा एमालेले झन्डामा उदाउँदो सूर्य चिन्ह राखेको छ ।
मोरङको विराटनगर महानगरपालिका-६ की सन्ध्या तिवारीको अध्यक्षतामा नेपाल कम्युनिष्ट पार्टी (एकीकृत मार्क्सवादी-लेनिनवादी) नामको पार्टी दर्ता गर्न आइतबार निवेदन परेको निर्वाचन आयोगका प्रवक्ता राजकुमार श्रेष्ठले बताएका छन् ।
निवेदन दर्ता गरेर दल दर्ताका लागि आवश्यक काजगात जुटाउन ४५ दिनको म्याद दिइएको छ ।
‘पेश हुन आएका कागजातहरू कानुन बमोजिम छ कि छैन आयोगले हेर्दैछ । २१ जनाको कार्यसमितिको नाम उल्लेख छ। अब आयोगले नामअनुसार हस्ताक्षर भेरिफिकेसन लगायतका काम गर्छ ।’, उनले भने ।
उनीहरूले पाँच सय जनाभन्दा बढीले दलमा आवद्ध हुने प्रतिवद्धता जनाएको हस्ताक्षर पनि आयोगमा पेश गरेका छन्।
उक्त पार्टीले झन्डाको नमूना पनि पेश गरेको छ । जसमा डाँडाबाट उदाउँदो सूर्यको चिन्ह राखिएको छ । तर झन्डाको व्याख्या भने गरिएको छैन।
सत्तारूढ नेकपाको स्थायी कमिटी बैठकमा मंगलबार अध्यक्ष पुष्पकमल दाहाल ‘प्रचण्ड’ले अर्का अध्यक्ष एवं प्रधानमन्त्री केपी शर्मा ओलीसँग एमाले नामको पार्टी दर्ताका लागि आयोगमा निवेदन परेकोबारे जवाफ मागेका थिए ।
प्रधानमन्त्री तथा अध्यक्ष ओलीले आफू नेकपाको अध्यक्ष भएकोले एमाले कसले दर्ता गर्न लागेको आफूलाई जानकारी नहुने जवाफ दिएका थिए । आज पर्यटनमन्त्री योगेश भट्टराईले एक अन्तरवार्तामा निर्वाचन आयोगमा एमाले नामको दल दर्ता भएको विषयमा दल दर्ता गर्ने स्वतन्त्रता सबै नागरिकलाई भएको तर आज जुन तहको छलफल बैठकमा हुँदैछ त्यो तहको वेटेज र ग्राभिटी राख्छ भन्ने विश्वास आफूलाई नलागेको बताएका थिए ।
पदाधिकारीहरुको सूचीः
अध्यक्ष- सन्ध्या तिवारी
उपाध्यक्ष- भगवती खड्का
महासचिव- मनिष उपाध्याय
सदस्यहरुः
अस्मिता सुनार
दावा लामा
जयराम राउत
खगेन्द्रप्रसाद भुसाल
राधा पुरी
हिराबहादुर बोहरा
तारादेवी शाही
पवन बिष्ट
निलम पोखरेल
किरण लामिछाने
उमेश महतो
उषा कुमारी झा
प्रदीप राज गिरि
पूर्णिमा तामाङ
निश्चल बस्नेत
सञ्जिव विष्ट
विनिता कार्की
विमला बिष्ट