विद्यार्थीहरूलाई पढाउँदा एउटा अनुभवी प्राध्यापकले आफ्नो हातमा पानीको गिलास समातेर कक्षा सुरु गरे । उनले त्यसलाई माथि उठाए, सबै विद्यार्थीहरूलाई देखाए र सोधे, “तिमीहरू भन्न सक्छौ यस गिलासको वजन कति होला ?”
विद्यार्थीहरूले अन्दाजी फरक फरक जवाफ दिए । कसैले भने ५० ग्राम होला, कसैले भने १०० ग्राम होला र कसैले १२५ ग्राम भने । प्राध्यापकले भने, “जब सम्म हामी यसको तौल गर्दैनौ तब सम्म सही वजन भन्न सक्दैनौ ।” तर मेरो प्रश्न यो हो कि यदि यो गिलासलाई मैले केही समय यस्तै उठाई राखेँ भने के होला ?”
‘केही हुँदैन’ … विद्यार्थीहरूले भने ।
“ल ठिक छ, यदि मैले एक घण्टा यस्तै गरी राखेँ भने ?” प्राध्यापकले सोधे ।
‘तपाईँको हात दुख्न थाल्छ’, एक विद्यार्थीले भन्यो ।
“तिमीले ठिक भन्यौ, तर यदि मैले पूरा दिन भरी यस्तै गरी रहेँ भने ?”
“तपाईँको हात सुन्न हुन सक्छ, तपाईँको मांसपेशीमा तनाव आउन सक्छ, पक्षाघात हुन सक्छ र तपाईँले निश्चित रूपमा अस्पताल जानु पर्ने हुन सक्छ”… केही विद्यार्थीले भने, र सबै जना हाँसे…!
“धेरै राम्रो ! तर के गिलासको वजन यस समयमा परिवर्तन भयो ?” प्राध्यापकले सोधे ।
उत्तर आयो .. “भएन”
“त्यसो भए किन हातमा दुखाई र मांसपेशीहरूमा तनाव भयो त ?” विद्यार्थीहरू छक्क परे ।
तब प्राध्यापकले सोधे, “अब मैले के गर्नु पर्छ पीडाबाट मुक्त हुन ?”
“गिलासलाई तल राखिदिनुहोस् !” एक विद्यार्थीले भन्यो ।
“एकदम ठिक !” प्राध्यापकले भने।
जीवनका समस्याहरू पनि यस्तै हुन्छन् । केही समयका लागि ती समस्याहरूलाई दिमागमा राख्दा केही फरक पर्दैन तर ती समस्याहरूको बारेमा सोची रहने हो भने पीडा हुन थाल्छ र अझै लामो समयका लागि ती समस्याहरूलाई दिमागमा राख्ने हो भने तिनीले तिमीहरूलाई पक्षाघात (paralyze) गर्नेछन् र तिमीहरू केही पनि गर्न सक्ने छैनौ ।
जीवनमा आउने चुनौती र समस्याहरूको बारेमा सोच्न महत्त्वपूर्ण छ, तर यो भन्दा बढी तिनीहरूलाई दिनको अन्तमा निदाउनु भन्दा पहिले तल राख्नु महत्त्वपूर्ण छ । यसो गर्दा तिमीहरू तनावग्रस्त (stressed) हुने छैनौ, तिमीहरू प्रत्येक बिहान ताजगीको साथ उठ्ने छौ र जीवनमा आउने कुनै पनि प्रकारका समस्याहरू वा चुनौतीहरूको सामना गर्न सक्षम हुनेछौ ।
सुर्खेत निवासी बडुवाल केटिएम दैनिकका नियमित स्तम्भकार हुन् । समसामयिक विषय र जीवनमा सकारात्मक ऊर्जा ल्याउने विषयमा उनले लेख लेख्छन् ।