प्रेस काउन्सिल नेपालका कार्यबाहक अध्यक्ष किशोर श्रेष्ठले छापा पत्रकारिता ‘डाइनोसर’ बन्ने अवस्थामा पुगेको बताएका छन् ।
सिन्धुपाल्चोकको चौतारामा आज प्रेस काउन्सिल नेपालले आयोजना गरेको साहित्यक पत्रकारिता र पत्रकार आचारसंहिता कार्यक्रममा उनले अहिले मौलाइरहेको विद्युतिय सञ्चारमाध्यमका कारण छापा पत्रकारिता लोप हुने अवस्थामा पुगेको बताएका हुन् ।
“अहिले युट्युब यसरी फस्टाइरहेका छन् कि जसले गर्दा छापा पत्रकारिता उठ्न नसक्ने अवस्थामा पुगेको छ”, श्रेष्ठले भने, “पत्रकारहरुले तलब पाएनन् भनेर आत्मह त्यासम्म गर्न बाध्य भएका उदाहरण छन् ।” सोका कारण छापा माध्यमका पत्रकारले आफुले ‘अपग्रेड’ गर्न जरुरी रहेको उनले बताए ।
विभिन्न कारणले गर्दा नेपालको विज्ञापन बजार ओरालो लाग्दै गरेका कारण सञ्चार क्षेत्र समस्यामा परेकाले अबको पत्रकारिता रगत र पसिना बगाएर गर्नुपर्ने श्रेष्ठको तर्क थियो ।
लामो समयदेखि छापामाध्यममा काम गर्ने पत्रकारहरुले तलव नपाएको कुरा सार्वजनिक भैरहँदा कार्यवाहक अध्यक्षको यस भनाईलाई महत्वका साथ हेरिएको छ । बिहीबार मात्र नेपालमा नाम चलेका मिडिया हाउसले १० महिनादेखि पत्रकारहरुको तलव नदिएको समाचार सार्वजनिक भएको थियो ।